વડોદરા તા.૧૫ : શહેરમાં 1 જુલાઈથી રિક્ષા મુસાફરી કરવી મોંઘી પડશે. વડોદરા આરટીઓ અને રિક્ષા યુનિયનની સંયુક્ત બેઠક બાદ રિક્ષાભાડામાં વધારો કરવાનો નિર્ણય લેવામાં આવ્યો છે. વધતા જતા પેટ્રોલ, ડીઝલ અને સીએનજીના ભાવને ધ્યાનમાં રાખીને રિક્ષાચાલકોને રાહત આપવા માટે આ નિર્ણય લેવાયો છે.

નવા ભાવ મુજબ રિક્ષાનું મિનિમમ ભાડું 30 રૂપિયાથી વધીને 35થી 40 રૂપિયા થશે. એટલે કે પ્રથમ 1.5 કિમી માટે જ 10 રૂપિયા સુધીનો સીધો વધારો થશે. ત્યારબાદ પ્રતિ કિલોમીટરના ભાડામાં પણ 2થી 3 રૂપિયાનો વધારો કરવામાં આવશે. શહેરમાં રોજ હજારો લોકો કામ, કોલેજ અને હોસ્પિટલ માટે રિક્ષાનો ઉપયોગ કરે છે, ત્યારે આ ભાડાવધારાથી સામાન્ય અને મધ્યમ વર્ગના લોકોના ખિસ્સા પર વધારાનો બોજ આવશે.

રિક્ષા યુનિયનના હોદ્દેદારોએ જણાવ્યું કે છેલ્લા 3 વર્ષથી ભાડામાં કોઈ વધારો થયો નહોતો અને સીએનજીના ભાવમાં 40%થી વધુનો વધારો થયો છે. જેના કારણે રિક્ષાચાલકોને રોજનું ગુજરાન ચલાવવું મુશ્કેલ બન્યું હતું. આરટીઓએ પણ રિક્ષાચાલકોની માંગને ધ્યાનમાં રાખીને ભાડાવધારાને મંજૂરી આપી દીધી છે. નવા ભાવના દર 1 જુલાઈથી શહેરની તમામ મીટરવાળી અને શેરિંગ રિક્ષામાં લાગુ પડશે.

ભાડાવધારાના નિર્ણય બાદ શહેરીજનોમાં મિશ્ર પ્રતિક્રિયા જોવા મળી રહી છે. એક તરફ રિક્ષાચાલકોએ આ નિર્ણયને આવકાર્યો છે, તો બીજી તરફ નિયમિત મુસાફરોને વધારાનો ખર્ચ કરવો પડશે.