અમદાવાદ તા.૧૫ : ગુજરાત હાઇકોર્ટે 13 વર્ષની દુષ્કર્મ પીડિત સગીરા માટે માનવતાના ધોરણે મહત્વપૂર્ણ ચુકાદો આપ્યો છે. કોર્ટે સગીરાને તેની ગર્ભાવસ્થા સમાપ્ત કરવાની એટલે કે ગર્ભપાતની મંજૂરી આપી દીધી છે. આ સાથે જૂનાગઢની સરકારી મેડિકલ કોલેજ અને હોસ્પિટલને તાત્કાલિક તબીબી પ્રક્રિયા હાથ ધરવા માટે આદેશ કર્યો છે.

આ મામલામાં પીડિતા પર દુષ્કર્મ થયું હતું અને ત્યારબાદ તે ગર્ભવતી બની હતી. ગર્ભપાતની મુદત MTP એક્ટ 1971 મુજબ 24 અઠવાડિયાથી વધુ થઈ ગઈ હતી. આ કારણે સરકારી હોસ્પિટલ દ્વારા ગર્ભપાત કરવાની ના પાડવામાં આવી હતી. ત્યારબાદ પીડિતાના પરિવારે હાઇકોર્ટમાં અરજી કરીને કહ્યું કે સગીર વયે માતા બનવું તેના શારીરિક અને માનસિક સ્વાસ્થ્ય માટે જોખમી છે. બાળકને જન્મ આપવો તેના માટે ભારે આઘાત સમાન બની શકે છે.

કોર્ટે મેડિકલ બોર્ડનો રિપોર્ટ મંગાવ્યો હતો. રિપોર્ટમાં જણાવાયું હતું કે સગીરાનું શરીર ગર્ભાવસ્થા અને પ્રસૂતિ માટે સંપૂર્ણ રીતે વિકસિત નથી. આવી સ્થિતિમાં પ્રસૂતિ દરમિયાન તેના જીવને જોખમ થઈ શકે છે. આ ઉપરાંત તેના માનસિક સ્વાસ્થ્ય પર પણ લાંબા ગાળાની અસર થવાની શક્યતા છે.

આ બધી બાબતોને ધ્યાનમાં રાખીને જસ્ટિસની બેન્ચે MTP એક્ટની સામાન્ય જોગવાઈઓથી અલગ જઈને ચુકાદો આપ્યો. કોર્ટે કહ્યું કે કાયદો જીવ બચાવવા માટે છે, જીવ જોખમમાં મૂકવા માટે નહીં. 13 વર્ષની બાળકી પર આટલું મોટું શારીરિક અને માનસિક બોજ નાખી શકાય નહીં.

હાઇકોર્ટે જૂનાગઢની સરકારી મેડિકલ કોલેજને આદેશ આપ્યો કે તેઓ તાત્કાલિક અને સર્વોચ્ચ તબીબી ધોરણે ગર્ભપાતની પ્રક્રિયા પૂર્ણ કરે. આ પ્રક્રિયા દરમિયાન પીડિતાની ગોપનીયતા જાળવવામાં આવે અને તેને કોઈપણ પ્રકારની હેરાનગતી ન થાય તેની તકેદારી રાખવા પણ કહ્યું છે. કોર્ટે એવું પણ સ્પષ્ટ કર્યું કે આ આદેશ માત્ર આ કેસની વિશેષ પરિસ્થિતિને ધ્યાનમાં રાખીને આપવામાં આવ્યો છે.

માનવાધિકાર કાર્યકરોએ આ ચુકાદાને આવકાર્યો છે. તેમનું કહેવું છે કે આ ચુકાદો સગીર વયની દુષ્કર્મ પીડિતાઓ માટે એક દાખલો બેસાડશે અને તેમના સ્વાસ્થ્ય અને અધિકારોને પ્રાથમિકતા આપશે.