કામરેજ: ગુજરાતના આરોગ્ય મંત્રી પ્રફુલ પાનશેરિયાના મતવિસ્તાર કામરેજમાંથી ફરી એકવાર ખાદ્ય ભેળસેળનો ચોંકાવનારો કિસ્સો સામે આવ્યો છે. નવાગામ GIDC વિસ્તારમાં પોલીસે દરોડો પાડી શંકાસ્પદ ઘી બનાવતા કારખાનાનો પર્દાફાશ કર્યો છે. ઘટનાએ ખાદ્ય સુરક્ષા અને લોકોના આરોગ્ય અંગે ગંભીર પ્રશ્નો ઉભા કર્યા છે.
મળતી માહિતી મુજબ કામરેજ પોલીસે નવાગામ GIDC સ્થિત ‘શ્રીજી ઇન્ડસ્ટ્રિયલ’ના પ્લોટ નંબર-7 પર દરોડો પાડતા ત્યાં ઘીના નામે ભેળસેળયુક્ત ઉત્પાદન કરવામાં આવતું હોવાનું બહાર આવ્યું હતું. પોલીસને સ્થળ પરથી ઘી બનાવવામાં ઉપયોગમાં લેવાતી વિવિધ સામગ્રીનો મોટો જથ્થો મળી આવ્યો હતો.
દરોડા દરમિયાન પોલીસે તેલના 15 ડબ્બા, 140 કિલો ક્રીમ, ભેંસના ઘીનો એક ડબ્બો, ગાયના ઘીનો એક ડબ્બો તેમજ અન્ય કાચા માલસામાન અને સાધનો જપ્ત કર્યા હતા. પ્રાથમિક તપાસમાં જાણવા મળ્યું છે કે આ એકમ છેલ્લા અંદાજે 15 દિવસથી ગુપ્ત રીતે કાર્યરત હતું અને આસપાસના લોકોને જાણ ન થાય તે રીતે કામગીરી ચલાવવામાં આવી રહી હતી.
પોલીસ હવે આ કારખાનામાં તૈયાર થતું શંકાસ્પદ ઘી ક્યાં સપ્લાય કરવામાં આવતું હતું, તેની પાછળ કોણ-કોણ સંકળાયેલા છે અને બજારમાં કેટલો જથ્થો પહોંચ્યો છે તે દિશામાં તપાસ આગળ વધારી રહી છે. જપ્ત કરાયેલા નમૂનાઓને ગુણવત્તા ચકાસણી માટે મોકલવાની કાર્યવાહી પણ હાથ ધરવામાં આવી છે.
આ ઘટનાએ સ્થાનિકોમાં ભારે રોષ ફેલાવ્યો છે. નાગરિકોએ આરોગ્ય સાથે ચેડાં કરનારા તત્વો સામે કડક કાર્યવાહી કરવાની માંગ ઉઠાવી છે.
અંતમાં, કામરેજ વિસ્તારમાં છેલ્લા કેટલાક સમયથી ભેળસેળયુક્ત ખાદ્યપદાર્થોના કિસ્સાઓ સતત સામે આવી રહ્યા છે. તાજેતરની કાર્યવાહી બાદ હવે ખાદ્ય સુરક્ષા વિભાગ અને પોલીસ તંત્ર આવા ગેરકાયદે ધંધાઓ સામે વધુ સઘન ઝુંબેશ ચલાવે તેવી અપેક્ષા વ્યક્ત કરવામાં આવી રહી છે