​બહુચરાજી (મહેસાણા): ​ઉતાવળ અને બેદરકારીપૂર્વક વાહન હંકારીને નિર્દોષ લોકોના જીવ જોખમમાં મૂકવાની એક હૃદયદ્રાવક ઘટના મહેસાણા જિલ્લાના પવિત્ર યાત્રાધામ બહુચરાજી વિસ્તારમાંથી સામે આવી છે. બહુચરાજી ખાતે આવેલી વૃંદાવન સોસાયટીમાં પોતાના ઘરના આંગણામાં શાંતિથી બેઠેલા પરિવારજનો પર કાળરૂપી બોલેરો ગાડી ફરી વળતાં અફરાતફરી અને ચીસાચીસ મચી ગઈ હતી.

​પ્રાપ્ત થતી વિગતો અનુસાર, વૃંદાવન સોસાયટીમાં એક બોલેરો ગાડી કાચી માટીમાં ફસાઈ ગઈ હતી. આ ગાડીને માટીમાંથી બહાર કાઢવા માટે તેના ચાલકે અવિચારીપણે ગાડીનું એક્સિલરેટર દબાવીને પૂરપાટ ઝડપે ભગાવવાનો પ્રયાસ કર્યો હતો. ગાડી માટીમાંથી બહાર નીકળતા જ ચાલકે પોતાના વાહન પરનો સંપૂર્ણ કાબૂ ગુમાવી દીધો હતો. બેફામ અને બિનનિયંત્રિત બનેલી બોલેરો ગાડી સીધી જ બાજુના ઘરના આંગણામાં બેઠેલા લોકો તરફ ધસી ગઈ હતી અને ઘરમાં બેઠેલા નિરપરાધ રહીશોને અડફેટે લઈ કચડી નાખ્યા હતા.

​આ ભયાનક અકસ્માતમાં આંગણે બેઠેલી બે મહિલાઓ બોલેરો ગાડી નીચે આવી જતાં ગંભીર રીતે લોહીલુહાણ થઈ ગઈ હતી. ધડાકાભેર થયેલા અકસ્માતનો અવાજ સાંભળી સોસાયટીના અન્ય રહીશો તાત્કાલિક ઘટનાસ્થળે દોડી આવ્યા હતા. લોકોએ ત્વરિત કવાયત હાથ ધરી ગંભીર રીતે ઘવાયેલી બંને મહિલાઓ તેમજ એક નાની માસૂમ બાળકીને તાકીદે સારવાર અર્થે નજીકની હોસ્પિટલમાં ખસેડ્યા હતા. જોકે, હોસ્પિટલમાં સારવાર દરમિયાન જ બંને કમનસીબ મહિલાઓએ આખરી શ્વાસ લેતાં બનાવ કરૂણ મોતમાં પરિણમ્યો હતો. બીજી તરફ, અકસ્માતનો ભોગ બનેલી નાની બાળકીના હાડકામાં ગંભીર ફેક્ચર થતાં તેને સારવાર હેઠળ રાખવામાં આવી છે.

​ઘરના આંગણે જ કાળ ભક્ષી જતાં મૃતક મહિલાઓના પરિવારમાં આક્રંદ છવાઈ ગયો છે. ચાલકની ઘોર બેદરકારી અને ઝડપના મોહમાં બે-બે નિર્દોષ મહિલાઓએ પોતાના જીવ ગુમાવવાનો વારો આવતાં સમગ્ર બહુચરાજી પંથકમાં ભારે શોકની કાલીમા છવાઈ ગઈ છે તેમજ સ્થાનિકોમાં વાહનચાલક સામે કડકમાં કડક કાર્યવાહી કરવાની માંગ સાથે રોષ વ્યાપ્યો છે. ઘટના અંગે પોલીસને જાણ કરાતાં પોલીસે કાયદેસરની તપાસ હાથ ધરી છે.