બનાસકાંઠા જિલ્લામાંથી પસાર થતા પાલનપુર-ડીસા હાઇવે પર માદક પદાર્થોની ગેરકાયદેસર હેરાફેરી થતી હોવાની સચોટ બાતમીના આધારે પાલનપુર પશ્ચિમ પોલીસ ટીમે લડબી નાળા નજીક વોચ ગોઠવી હતી. ચેકિંગ દરમિયાન પોલીસે શંકાસ્પદ હલચલ ધરાવતા ચાર શખ્સોની અટકાયત કરીને તલાશી લેતાં તેમની પાસેથી 198 ગ્રામ એમડી ડ્રગ્સ (MD Drugs) મળી આવ્યું હતું.

પોલીસના જણાવ્યા અનુસાર, ઝબ્બે કરાયેલા ડ્રગ્સની અંદાજિત કિંમત રૂ. 19,80,000 થાય છે. આ નશીલા પદાર્થની હેરાફેરીમાં વપરાયેલા વાહન અને અન્ય ચીજવસ્તુઓ મળીને પોલીસે કુલ રૂ. 25.35 લાખનો મુદ્દામાલ જપ્ત કર્યો છે. ઝડપાયેલા ચાર આરોપીઓની પ્રાથમિક પૂછપરછમાં સામે આવ્યું છે કે તેમાંથી ત્રણ શખ્સો અમદાવાદના રહેવાસી છે, જ્યારે એક શખ્સ બનાસકાંઠાના દાંતીવાડા વિસ્તારનો છે. આ અંગે પાલનપુર પશ્ચિમ પોલીસ સ્ટેશન ખાતે NDPS એક્ટ હેઠળ ગુનો દાખલ કરવામાં આવ્યો છે.

આટલી મોટી માત્રામાં એમડી ડ્રગ્સનો જથ્થો ક્યાંથી લાવવામાં આવ્યો હતો અને ઉત્તર ગુજરાત કે અમદાવાદમાં કોને સપ્લાય કરવાનો હતો તે અંગે પોલીસે ઊંડાણપૂર્વકની તપાસ હાથ ધરી છે. પોલીસ આરોપીઓને અદાલતમાં રજૂ કરી રિમાન્ડ મેળવશે, જેથી આ ડ્રગ્સ રેકેટ પાછળ સંકળાયેલા મુખ્ય સૂત્રધારો અને સ્થાનિક નેટવર્કનો પર્દાફાશ કરી શકાય.