નર્મદા જિલ્લાના સાગબારા અને ઉમરપાડા વિસ્તારના લાંબા સમયથી ચાલી રહેલા જમીન વિવાદ અંગે મુખ્યમંત્રીએ સાંસદ મનસુખભાઈ વસાવા સાથે વિશેષ ચર્ચા કરી છે. ગાંધીનગર ખાતે મુખ્યમંત્રી નિવાસ સ્થાને યોજાયેલી આ બેઠકમાં મુખ્યમંત્રીએ સમગ્ર જમીન વિવાદ અંગેની વિગતવાર જાણકારી મેળવી હતી. આ મામલાનો યોગ્ય અને કાયમી ઉકેલ લાવવા માટે આગામી દિવસોમાં વન મંત્રીની ઉપસ્થિતિમાં વધુ એક ઉચ્ચસ્તરીય બેઠકનું આયોજન કરવામાં આવશે, જેમાં સમગ્ર વિવાદ અંગે ફરીથી વિસ્તૃત ચર્ચા હાથ ધરાશે.