ગોધરા: પંચમહાલ જિલ્લામાં આજે સવારથી મેઘરાજાએ જોરદાર બેટિંગ કરતાં શહેરા તાલુકો વરસાદથી તરબતર બન્યો હતો. બપોર બાદના આંકડા મુજબ શહેરામાં વરસાદ વધીને આશરે ૧૩૬ મિમી એટલે કે ૫.૩૫ ઇંચ સુધી પહોંચ્યો હતો. સવારે માત્ર બે કલાકમાં જ આશરે અઢી ઇંચ વરસાદ નોંધાયો હતો. ભારે વરસાદના કારણે અનેક નીચાણવાળા વિસ્તારોમાં પાણી ભરાયા અને કેટલાક માર્ગો ઉપર પાણીના ધસમસતા પ્રવાહ જોવા મળ્યા. ગોધરા સહિત જિલ્લાના ગ્રામ્ય વિસ્તારોમાં પણ વરસાદી માહોલ જામ્યો હતો. 

વરસાદને પગલે પંચમહાલની જીવાદોરી સમાન પાનમ ડેમમાં પાણીની આવકમાં નોંધપાત્ર વધારો થયો છે. ઉપલબ્ધ વિગતો મુજબ એક તબક્કે ડેમમાં ૯,૭૫૦ ક્યુસેક પાણીની આવક નોંધાઈ હતી અને જળસપાટી ૧૨૩.૩૫ મીટર સુધી પહોંચી હતી. ડેમની નિયત રૂલ લેવલ સપાટી ૧૨૬.૩૭ મીટર હોવાનું જણાવાયું છે. 

હવામાન વિભાગની આજની સત્તાવાર આગાહી વધુ સાવધ રહેવાનો સંકેત આપે છે. પંચમહાલ, દાહોદ અને મહીસાગરમાં છૂટાછવાયા સ્થળોએ અતિ ભારે વરસાદની શક્યતા દર્શાવવામાં આવી છે; ગાજવીજ અને પ્રતિ કલાક ૩૦થી ૪૦ કિલોમીટરની ઝડપે પવનની પણ સંભાવના છે.