અમદાવાદ,તા.૧૭: ગુજરાતમાં મેડિકલ અને ડેન્‍ટલ પ્રવેશ માટે આ વર્ષે સ્‍પર્ધાનું ચિત્ર બદલાયું છે. NEET ક્‍વોલિફાય કરનારા વિદ્યાર્થીઓની સંખ્‍યા ગયા વર્ષના ૫૧,૦૦૦થી ઘટીને ૩૮,૦૦૦ થઈ છે. જોકે, ક્‍વોલિફાય થયેલા વિદ્યાર્થીઓના ગુણ વધુ હોવાથી ટોચની સરકારી અને સ્‍વનિર્ભર કોલેજોમાં પ્રવેશ માટેનું કટ-ઓફ ઊંચું રહેવાની શક્‍યતા છે.

આ વર્ષે રાજ્‍યના મેરિટ લિસ્‍ટમાં ૧૫,૬૫૧ ઉમેદવારોનો સમાવેશ થયો છે. ગયા વર્ષે આ સંખ્‍યા આશરે ૨૪,૦૦૦ હતી. કુલ ૧૬,૪૩૦ ઉમેદવારોએ નોંધણી કરાવી હતી, જેમાંથી ૬૦૯ ઉમેદવારો ગેરલાયક ઠર્યા છે.

શિક્ષણ વિભાગના વરિષ્ઠ અધિકારીઓના જણાવ્‍યા મુજબ, ઉમેદવારોની સંખ્‍યા ઘટી હોવા છતાં ટોચના ક્રમે રહેલા વિદ્યાર્થીઓ વચ્‍ચે સ્‍પર્ધા ઓછી નહીં થાય. કારણ કે આ વર્ષે NEETમાં ક્‍વોલિફાય થયેલા ઉમેદવારોના ગુણ પ્રમાણમાં વધુ છે. તેથી શહેરોની ટોચની સરકારી અને સ્‍વનિર્ભર મેડિકલ તથા ડેન્‍ટલ કોલેજોમાં પ્રવેશ માટે ઊંચી કટ-ઓફ યથાવત રહેવાની શક્‍યતા છે.

આ વર્ષે ગુજરાતમાંથી એક પણ ઉમેદવારને NEETમાં સંપૂર્ણ ૭૨૦માંથી ૭૨૦ ગુણ મળ્‍યા નથી. તેની સરખામણીએ ૨૦૨૫માં ગુજરાતના ૧૬ ઉમેદવારોએ ૭૨૦માંથી ૭૨૦ ગુણ મેળવ્‍યા હતા.

પ્રવેશ સમિતિ સાથે સંકળાયેલા સૂત્રોના જણાવ્‍યા અનુસાર, અમદાવાદની ટોચના સરકારી અને સ્‍વનિર્ભર કોલેજોમાં કટ-ઓફ સામાન્‍ય રીતે ઊંચું રહેવાનું છે. જ્‍યારે શહેરની બહારના વિસ્‍તારોમાં આવેલી કોલેજોમાં મેરિટમાં થોડો ઘટાડો જોવા મળી શકે છે.

વિદ્યાર્થીઓ રાજ્‍યની સત્તાવાર વેબસાઇટ પર ૧૯ ઓગસ્‍ટ સુધી ઓનલાઇન સુધારા ફોર્મ સબમિટ કરી શકશે. રાજ્‍ય ક્‍વોટાની પ્રવેશ પ્રક્રિયાનું સમયપત્રક ઓલ ઇન્‍ડિયા ક્‍વોટાની પ્રક્રિયા પૂર્ણ થયા બાદ જાહેર કરવામાં આવશે.

ગુજરાતની મેડિકલ-ડેન્‍ટલ પ્રવેશ પ્રક્રિયા માટે તૈયાર કરાયેલી મેરિટ લિસ્‍ટમાં કુલ ૧૫,૬૫૧ ઉમેદવારોનો સમાવેશ થયો છે. તેમાં જનરલ વર્ગના ૩,૮૦૪, એસઈબીસી વર્ગના ૪,૭૬૮, એસસી વર્ગના ૧,૮૦૦, એસટી વર્ગના ૨,૨૮૨ અને ઈડબ્‍લ્‍યુએસ વર્ગના ૨,૯૯૭ ઉમેદવારોનો સમાવેશ થાય છે. રાજ્‍યમાં પ્રવેશ માટે કુલ ૧૬,૪૩૦ ઉમેદવારોએ નોંધણી કરાવી હતી, જેમાંથી ૬૦૯ ઉમેદવારો ગેરલાયક ઠરતાં તેમને મેરિટ લિસ્‍ટમાં સ્‍થાન મળ્‍યું નથી. પરિણામે કુલ નોંધણી કરાવનારા ૧૬,૪૩૦ ઉમેદવારોમાંથી ૧૫,૬૫૧ ઉમેદવારો મેરિટ લિસ્‍ટમાં સામેલ થયા છે.