વડોદરા જિલ્લાની નંદેસરી પોલીસે બાતમીના આધારે ફાજલપુર ટોલનાકા પાસેથી ડેરોલ રેલવે પોલીસ સ્ટેશનના હેડ કોન્સ્ટેબલ સંજય ચુડાસમા તેમજ તેના મુખ્ય સાગરીત વિક્રમ ઢાપાને રૂ. 4.60 લાખની કિંમતના ભારતીય બનાવટના વિદેશી દારૂના મોટા જથ્થા સાથે રંગેહાથ ઝડપી પાડ્યા છે.

નંદેસરી પોલીસ સ્ટેશનની ટીમને ચોક્કસ બાતમી મળી હતી કે એક શંકાસ્પદ વાહનમાં મોટા પાયે વિદેશી દારૂનો જથ્થો વડોદરા તરફ લાવવામાં આવી રહ્યો છે. આ બાતમીના આધારે પોલીસે ફાજલપુર ટોલનાકા પાસે સઘન વાહન ચેકિંગ ગોઠવ્યું હતું. શંકાસ્પદ વાહન આવતાં તેને કોર્ડન કરીને તલાશી લેવામાં આવતાં તેમાંથી અલગ-અલગ બ્રાન્ડની વિદેશી દારૂ અને બિયરની બોટલો મળી આવી હતી. જેની અંદાજિત બજાર કિંમત રૂ. 4.60 લાખ આંકવામાં આવી છે.

પોલીસે સ્થળ પરથી દારૂનો જથ્થો, હેરાફેરી માટે વપરાયેલ વાહન અને મોબાઈલ ફોન સહિત કુલ રૂ. 7 લાખનો મુદ્દામાલ કાયદેસર રીતે કબજે કર્યો છે. ગાડીમાં સવાર બંને વ્યક્તિઓની પૂછપરછ કરતાં એક શખ્સ પંચમહાલ જિલ્લાના ડેરોલ રેલવે પોલીસ સ્ટેશનમાં ફરજ બજાવતો હેડ કોન્સ્ટેબલ સંજય ચુડાસમા હોવાનું સામે આવતાં પોલીસ કર્મીઓ પણ ચોંકી ઉઠ્યા હતા.

પોલીસની પ્રાથમિક પૂછપરછમાં એવો પર્દાફાશ થયો છે કે આ વિદેશી દારૂની હેરાફેરી સુરત શહેરના લિંબાયત વિસ્તારમાંથી કરવામાં આવતી હતી. ખાખી વર્દી અને પોલીસ ઓળખકાર્ડનો દુરુપયોગ કરીને ચેકપોસ્ટ કે પોલીસ તપાસમાંથી સરળતાથી બચી નીકળવા માટે પોલીસકર્મી પોતે જ આ રેકેટમાં સક્રિય બન્યો હતો. નંદેસરી પોલીસે પ્રોહિબિશન એક્ટ હેઠળ ગુનો દાખલ કરી બંને આરોપીઓને કોર્ટમાં રજૂ કર્યા હતા, જ્યાં અદાલતે સમગ્ર નેટવર્ક અને અન્ય સંડોવાયેલા શખ્સોના પર્દાફાશ માટે બંને આરોપીઓના રિમાન્ડ મંજૂર કર્યા છે.