વડોદરા : સંસ્કારી નગરી વડોદરાના સમા વિસ્તારમાં કરોડો રૂપિયાની કિંમતી જમીન પચાવી પાડવાનું એક સનસનાટીભર્યું કૌભાંડ સામે આવ્યું છે. મૂળ જમીન માલિકોની અજાણતામાં બોગસ અને નકલી પાવર ઓફ એટર્ની તૈયાર કરીને રૂ. ૧.૨૪ કરોડથી વધુની કિંમતનો વેચાણ દસ્તાવેજ બનાવી દેનાર સુનિલ રફાયલ પરમાર નામના શખ્સ સામે પોલીસે છેતરપિંડી અને વિશ્વાસઘાતનો ગુનો નોંધી કાયદેસરની તપાસ હાથ ધરી છે.

બનાવની પ્રાપ્ત વિગતો અનુસાર, આરોપી સુનિલ પરમારે શાતિર દિમાગનો ઉપયોગ કરીને જમીન માલિકોના નામના નકલી પાવર ઓફ એટર્ની બનાવી લીધા હતા અને તેની નોંધણી પણ છાણી સ્થિત સબ-રજિસ્ટ્રાર કચેરીમાં કરાવી દીધી હતી. ત્યારબાદ આ બોગસ દસ્તાવેજોને સાચા તરીકે દર્શાવી ખરીદદારો નરેન્દ્ર શોભરાજમલ મુલચંદાની, જયેશ મણીલાલ પટેલ અને અતુલ જેરામ દેસાઈને રૂ. ૧,૨૪,૨૦,૦૦૦ની માતબર રકમમાં જમીનનો વેચાણ દસ્તાવેજ કરી આપી મોટું કૌભાંડ આચર્યું હતું.

તપાસ અધિકારીઓને ગેરમાર્ગે દોરવાનો અસફળ પ્રયાસ

પોલીસને આ પ્રકરણની ગંધ આવી જતાં પ્રાથમિક તપાસ ચાલુ થઈ હતી. પરંતુ આરોપી સુનિલ પરમારે પોતાની ચાલાકી ચાલુ રાખી તપાસને ભટકાવવાનો પ્રયાસ કર્યો હતો. તેણે જમીન માલિકોના નામે નકલી સહીઓ અને બોગસ ફોટોગ્રાફ્સ લગાડીને એક સોગંદનામું ઊભું કર્યું હતું. આ સોગંદનામામાં અરજી બિનશરતી પરત ખેંચવાની વિગતો દર્શાવી ટપાલ મારફતે તપાસ અધિકારીને મોકલી આપીને મામલો રફે-દફે કરવાનો નિષ્ફળ પ્રયાસ કર્યો હતો.

જમીન માલિકોએ નોંધાવી ફરિયાદ

આ સમગ્ર ષડયંત્ર અને કરોડોના કૌભાંડની જાણ થતાં જ મૂળ જમીન માલિકો અને તેમના સાહેદ કેતનભાઈ મોતીલાલ ગુર્જર હેબતાઈ ગયા હતા. તેઓએ ત્વરિત પોલીસ મથકે પહોંચી સુનિલ પરમાર તથા આ કૌભાંડમાં સંડોવાયેલા તમામ શખ્સો સામે કડકમાં કડક કાયદાકીય કાર્યવાહી કરવા લેખિત ફરિયાદ નોંધાવી છે. પોલીસે ગુનો નોંધી આરોપીઓને ઝડપી પાડવા માટે આગળની તપાસ તેજ કરી છે.