નવસારી : દિલ્હીના જંતર-મંતર ખાતે દેશના યુવાઓ (Gen Z) દ્વારા કરવામાં આવેલા તાજેતરના વિરોધ પ્રદર્શનને લઈને કેન્દ્રીય જળ શક્તિ મંત્રી અને ગુજરાત ભાજપના પ્રદેશ અધ્યક્ષ સી.આર. પાટીલે એક અત્યંત મહત્વપૂર્ણ સ્પષ્ટતા કરી છે. નવસારી ખાતે યોજાયેલી જિલ્લા ભાજપની ત્રિ-દિવસીય પ્રશિક્ષણ શિબિરના ઉદ્ઘાટન પ્રસંગે સંબોધન કરતા સી.આર. પાટીલે જણાવ્યું હતું કે, જંતર-મંતર પર યુવાઓનું આ આંદોલન વડાપ્રધાન નરેન્દ્ર મોદી કે કેન્દ્ર સરકાર વિરુદ્ધ નહોતું, પરંતુ તે માત્ર ને માત્ર નીટ (NEET) અને અન્ય સ્પર્ધાત્મક પરીક્ષાઓના પેપર લીક કરનારા અસામાજિક તત્વો સામે કડક પગલાં લેવાની માગ સાથે કરવામાં આવ્યું હતું.

નવસારી જિલ્લા ભાજપ દ્વારા પક્ષની વિચારધારા, કાર્યપદ્ધતિ અને સંગઠનાત્મક માળખાને વધુ મજબૂત કરવાના હેતુથી ત્રણ દિવસીય પ્રશિક્ષણ વર્ગનું આયોજન કરવામાં આવ્યું છે. સ્થાનિક ધારાસભ્યો અને અગ્રણી પદાધિકારીઓની વિશેષ ઉપસ્થિતિમાં આ વર્ગનો પ્રારંભ થયો હતો. મંચ પરથી બોલતા સી.આર. પાટીલે દિલ્હીના યુવા આંદોલનની પ્રશંસા કરતા ઉમેર્યું કે, આંદોલન પૂર્ણ થયા બાદ પરિસરની સફાઈ કરીને યુવાનોએ પોતાની નાગરિક ફરજ અને ઉત્કૃષ્ટ સંસ્કારોનું ઉદાહરણ પૂરું પાડ્યું હતું.

આ સાથે જ તેમણે વિપક્ષ કોંગ્રેસ પર આકરા પ્રહારો કરતા જણાવ્યું હતું કે, જમીની સ્તર પરથી સાવ ગાયબ થઈ ચૂકેલી કોંગ્રેસે યુવાઓના આ સ્વયંભૂ આંદોલનમાં ઘૂસીને પોતાના રાજકીય રોટલા શેકવાનો અસફળ પ્રયાસ કર્યો હતો. પરંતુ દેશની જાગૃત અને સમજદાર Gen Z પેઢી તેમની ચાલ સમજી ગઈ હતી અને કોંગ્રેસના નેતાઓને આંદોલનમાંથી દૂર રાખી પ્રવેશવા દીધા નહોતા.

ઉલ્લેખનીય છે કે, આ ત્રિ-દિવસીય શિબિરમાં કુલ ૧૧ વિષયગત સત્રો યોજાનાર છે, જેમાં મોરચાના ૬૬ હોદ્દેદારો અને ૧૦૦થી વધુ સિનિયર કાર્યકરો ઉપસ્થિત રહી માર્ગદર્શન મેળવી રહ્યા છે. આ શિબિરમાં વર્ષ ૨૦૧૪થી વડાપ્રધાન નરેન્દ્ર મોદીના નેતૃત્વ હેઠળ લેવાયેલા ઐતિહાસિક દેશહિતના નિર્ણયો તેમજ નવસારી લોકસભા વિસ્તારમાં થયેલા વિવિધ વિકાસ કાર્યોને દર્શાવતી એક ખાસ પ્રદર્શની પણ ગોઠવવામાં આવી છે, જે કાર્યકર્તાઓ માટે આકર્ષણનું કેન્દ્ર બની છે.