ભરૂચ :સનાતન ઈન્ટરનેશનલ એકેડેમી ખાતે વિદ્યાભારતી પરિવાર દ્વારા સક્ષમ કિશોરી પુસ્તક વિમોચન કાર્યક્રમ રાજ્યપાલ આચાર્ય દેવવ્રતજીની ઉપસ્થિતિમાં યોજાયો હતો.

   આ પ્રસંગે રાજ્યપાલ તથા મહાનુભાવોના વરદહસ્તે કિશોરીઓના શારીરિક, માનસિક, બૌદ્ધિક, સામાજિક અને આધ્યાત્મિક વિકાસ તેમજ સમાજ માટે માર્ગદર્શક બનનાર 'સક્ષમ કિશોરી' પુસ્તકનું વિમોચન કરવામાં આવ્યું હતું.
 રાજ્યપાલ આચાર્ય દેવવ્રતજીએ ઉપસ્થિતોને સંબોધતા કહ્યું કે, ભારતીય સંસ્કૃતિમાં પ્રાચીન સમયથી જ ૧૬ સંસ્કારો દ્વારા વ્યક્તિત્વનું ઘડતર કરીને બાળકને 'કુંદન' બનાવવાની પરંપરા રહી છે. વિદ્યા એ જ સાચું શિક્ષણ છે જે મનુષ્યને તમામ દૂષણોમાંથી મુક્તિ અપાવે છે. આધુનિક સમયમાં ભૌતિક સુખો પાછળ દોડવાને બદલે આદર્શ, પરોપકાર, સહિષ્ણુતા અને માનવતાનું આચરણ કરવું એ જ મનુષ્ય જીવનનો સાચો ધ્યેય હોવો જોઈએ.
   વર્તમાન સમયના પડકારો અંગે ચિંતા વ્યક્ત કરતા તેમણે ઉમેર્યું કે, માતા એ બાળક નિમાર્તા છે, માત્ર જન્મ આપવાથી માતાની જવાબદારી પૂર્ણ થતી નથી. કિશોરાવસ્થા એવો તબક્કો છે જ્યાં બાળકો બુદ્ધિ કરતાં હૃદયથી વધુ નિર્ણયો લે છે અને ડિજિટલ દુનિયાની કાલ્પનિક બાબતોને સાચું જીવન માની બેસે છે. આવા સમયે બાળકોને ધિક્કારવા કે એકલા છોડી દેવાને બદલે તેમની સાથે મિત્રવત વ્યવહાર કરી સંવેદનશીલતાથી તેમની મૂંઝવણો ઉકેલવી જોઈએ. તેમને યોગ્ય માર્ગદર્શન અને સંસ્કાર આપીશું, તો જ એક સક્ષમ અને સંસ્કારી પેઢીનું નિર્માણ શક્ય બનશે.
  તેમણે વધુમાં ઉમેર્યું કે, કિશોર અવસ્થામાં અનુશાસન રાખનાર શિક્ષક કે માતા-પિતા કદાચ કડક લાગે, પરંતુ માતા-પિતા અને શિક્ષકથી મોટો કોઈ હિતેચ્છુ નથી હોતો. માણસ માત્ર ભૂલને પાત્ર છે. કોઈપણ ભૂલ થાય તો તેને છુપાવવાને બદલે માતા-પિતા કે શિક્ષક આગળ નિખાલસપણે  કહી દેવી જોઈએ. ભૂલ સ્વીકારી લેવાથી ૯૦% મુશ્કેલીઓનો ઉકેલ આવી જાય છે.

   આજે દીકરીઓ ડોક્ટર, એન્જિનિયર, પાઇલટ અને દેશની સીમાઓનું રક્ષણ કરી દરેક ક્ષેત્રે દેશનું નામ રોશન કરી રહી છે. આધુનિકતાની સાથે સાથે મૂળ સંસ્કારો સાથે પણ જોડાયેલા રહેવું ખૂબ જરૂરી છે.

 રાજ્યપાલએ કિશોરીઓને અનુરોધ કરતા કહ્યું હતું કે, આધુનિકતાની સાથે સાથે આપણે આપણા પ્રાચીન સંસ્કારો, ‘માતૃદેવો ભવ:’, ‘પિતૃદેવો ભવ:’ અને ‘આચાર્યદેવો ભવ:’ ની પરંપરાને જાળવી રાખવાની છે. જેના માટે 'સક્ષમ કિશોરી' પુસ્તક કિશોરીઓ અને તેમના માતા-પિતા માટે અત્યંત ઉપયોગી અને ઉદાહરણરૂપ છે.

  અંતમાં રાજ્યપાલએ ઉપસ્થિત તમામ માતા-પિતા અને શિક્ષણકારોને સાથે મળીને આવનારી પેઢીને માત્ર વિદ્યા જ નહીં પણ ઉચ્ચ સંસ્કાર આપવાનો દ્રઢ સંકલ્પ કરવા આહ્વાન કર્યું હતું.
   આ કાર્યક્રમમાં ધારાસભ્ય રમેશ મિસ્ત્રી, જિલ્લા કલેક્ટર નવનાથ ગવ્હાણે, જિલ્લા વિકાસ અધિકારી યોગેશ કાપસે, જિલ્લા પોલીસ અધિક્ષક અક્ષયરાજ મકવાણા, પ્રકોષ્ઠ પ્રમુખ કનુભાઈ કરકર, સનાતન ઈન્ટરનેશન એકેડમીના ટ્રસ્ટીઓ, હોદ્દેદારો,  સુ.શ્રી. મયુરીબેન પટેલ, વિદ્યાભારતી પરિવારના કાર્યકરો, શાળાના બાળકો અને  માતાપિતા સહિત મોટી સંખ્યામાં નગરજનો ઉપસ્થિત રહ્યા હતા