ભરૂચના રેલવે ગોદી વિસ્તારમાં ગટર કાસમાં પડેલા એક આખલાને બહાર કાઢવાની કામગીરી દરમિયાન માનવ કંકાલ મળી આવતાં સમગ્ર વિસ્તારમાં ભારે ચકચાર મચી ગઈ છે. અચાનક માનવ કંકાલ મળી આવવાના આ બનાવે સ્થાનિકોમાં નાના-મોટા અનેક તર્ક-વિતર્કો ઊભા કર્યા છે. ઘટના અંગે રેલવે પોલીસને જાણ કરાતાં જ કાફલો સ્થળ પર દોડી આવ્યો હતો અને કંકાલને કબજે લઈને આગળની કાયદેસરની કાર્યવાહી હાથ ધરી હતી. હાલ પોલીસે આ કંકાલની ઓળખ છતી કરવા સહિત વિવિધ દિશાઓમાં તપાસનો દોર શરૂ કર્યો છે, જ્યારે પોસ્ટમોર્ટમ રિપોર્ટ અને ઊંડાણપૂર્વકની પોલીસ તપાસ બાદ જ આ સમગ્ર ઘટના પાછળનું ગૂઢ રહસ્ય ઉકેલાય તેવી શક્યતા સેવાઈ રહી છે.