દાહોદ જિલ્લાના લીમખેડા વિસ્તારમાંથી પોલીસ દ્વારા મોટા પ્રમાણમાં વિદેશી દારૂનો જથ્થો ઝડપી પાડવામાં આવ્યો હતો. નાની વાસવાણી ગામે ઉચવાસ ફળીયામાં ગેરકાયદેસર રીતે દારૂ લાવવામાં આવ્યો હતો. બુટલેગરો રાજસ્થાન અને મધ્યપ્રદેશથી ગુજરાતમાં દારૂ ઘૂસાડવા માટે અવનવા કિમિયાઓ અપનાવતા હોય છે. આવું જ કંઈક આ કિસ્સામાં પણ સામે આવ્યું હતું.

પિકઅપ ગાડીમાં ડુંગળી અને લસણના કટ્ટાઓની આડમાં વિદેશી દારૂ લાવવામાં આવ્યો હતો. પોલીસને જોઈને પિકઅપ ગાડીનો ચાલક વાહન મૂકીને ફરાર થઈ જવામા સફળ રહ્યો હતો. પોલીસે પીકઅપ ગાડીમાથી 2160 નંગ વિદેશી દારૂની બોટલો જપ્ત કરી છે જેની કિંમત 2.89 લાખ રૂપિયા છે. દરોડા દરમિયાન પોલીસે 2.89 લાખનો દારૂ, 3 લાખની પિકઅપ ગાડી અને 50 હજારની એક બાઈક જપ્ત કરી હતી.  પોલીસે કુલ 6.39 લાખ રૂપિયાના મુદ્દામાલની જપ્તી કરીને ગુનો નોંધી વધુ તપાસ હાથ ધરી છે. આ સાથે જ ફરાર થયેલા બુટલેગરને ઝડપી પાડવા માટે પોલીસે ચક્રો ગતિમાન કર્યા છે