ગાંધીનગરથી ૨૦  કિલોમીટરની અંતરે આવેલું છે શેરથા ગામ. આ ગામ તેના મરચાંના સ્વાદ માટે વિખ્યાત છે પણ આ ગામના બહેનો ગામની બીજી ઓળખ પણ ઉભી કરી રહ્યા  છે. અહીંના બહેનોએ જય ગજાનંદ મિશન મંગલમ સખી મંડળના નેજા હેઠળ આકર્ષક રાખડીઓ બનાવી આર્થિક સ્વાવલંબનની દિશામાં પગરણ માંડ્યા છે. 

ગામના ચબુતરાવાળા વાસની શેરીમાં ઊનની દોરીમાં રંગબેરંગી મોતી પરોવતો એક ચહેરો કમળાબેન વાઘેલા. કમળાબહેન ૬૬  વર્ષની વય વટાવી ચૂક્યા છે છતાં તેમના પરિશ્રમ થકી પરિવારને પ્રેરણા પૂરી પાડી રહ્યા છે. સ્મિત સાથે તેઓ કહે છે  : “રાખડી બનાવવી મને ગમે છે. આ કામમાં મને આનંદ આવે છે.” 

 કમળાબહેનની જેમ જ ગામના અન્ય બહેનો પણ વિવિધ આર્થિક પ્રવૃત્તિઓ થકી પરિવારને આર્થિક સહયોગ આપે છે. વર્ષ ૨૦૧૮ થી ગજાનન મિશન મંગલમ સખી મંડળ સાથે જોડાયેલા પ્રજ્ઞાબહેન કહે છે અમે રાખડી ઉપરાંત ગણેશ-ઉત્સવ માટે ગણેશજીની મૂર્તિઓ બનાવીએ છીએ તેમ જ ઘર-સુશોભનની ચીજવસ્તુઓ પણ તૈયાર કરીએ છીએ. આ ઉત્પાદક પ્રવૃત્તિઓના પરિણામે મંડળની બહેનો ઘરના કામકાજ બાદ ફ્રી ટાઈમમાં અઢી થી ત્રણ હજાર રૂપિયાની કમાણી કરે છે. આ કમાણી બાળકોના ભણતરમાં ઉપયોગી થાય છે. 

મંડળના અન્ય સભ્યો હેતલબહેન અને નૈનાબહેન એક સૂરે કહે છે : “આ પ્રવૃત્તિ બહેનોને ઘરે બેઠાં આર્થિક સ્વાવલંબન પ્રાપ્ત કરવામાં મદદરૂપ બને છે.”

જીવનના છ દાયકાના તડકા- છાયાં જોઈ ચૂકેલા કમળાબહેન તેમની આ ખુમારીના કારણે તેમના પુત્રવધૂ રંજનબહેન વાઘેલા માટે રોલમોડલ છે. રંજનબહેન કહે છે , “બા ના સાથ-સહકારથી જ હું મિશન મંગલમ હેઠળ સરકારી સહાય-તાલીમ પ્રાપ્ત કરી શકી  છું અને આજે જય ગજાનંદ મિશન મંગલમ કેન્ટીન સફળતાપૂર્વક ચલાવું છે. દર મહિને રૂ.૨૦,૦૦૦ રકમની આવક થાય છે. જે મારી દીકરીઓના ઉચ્ચ અભ્યાસ માટે ખપમાં આવે છે.” 

ગુજરાત લાઇવલીહૂડ પ્રમોશન કંપની (GLPC) કમળાબહેન અને રંજનબહેન જેવા  લાખો બહેનોને 'રાષ્ટ્રીય ગ્રામીણ આજીવિકા મિશન' હેઠળ તાલીમ અને આર્થિક સહાય પૂરી પાડે છે. જે આ બહેનોને આર્થિક રીતે આત્મનિર્ભર બનવાનું સપનું સાકાર કરવામાં ઉપયોગી નીવડે છે. ગજાનંદ મિશન મંગલમ સખી મંડળના આ બહેનો વક્તિગત રીતે રૂ.૨૫૦૦થી 3૦૦૦ આવક મેળવે છે. તેમની વાર્ષિક આવક આશરે રૂ.૩૬,૦૦૦ જેટલી થાય છે. 

શેરથાના આ બહેનોની આત્મનિર્ભરતાની આ કહાની દર્શાવે છે કે આ બહેનો માત્ર ઊનના દોરાથી રાખડી જ નથી ગૂંથતા, પરંતુ તેમના પરિવારની આર્થિક સુરક્ષાના તાંતણાને વધુ મજબૂત બનાવી રહ્યા છે.