ગાંધીનગર તા.૨૭: નર્મદા જિલ્લાના સાગબારા વિસ્‍તારમાં છેલ્લા કેટલાક સમયથી જંગલ જમીનના હક અને ખેડાણ મુદ્દે આદિવાસી સમુદાય દ્વારા ચલાવવામાં આવી રહેલા આંદોલનને લઈને અત્‍યાર સુધીના સૌથી મોટા સમાચાર સામે આવ્‍યા છે.

આદિવાસીઓના આ ઉગ્ર આંદોલનનો વહેલી તકે સુખદ ઉકેલ લાવવા માટે રાજ્‍ય સરકારે સક્રિય પ્રયાસો શરૂ કરી દીધા છે.

આ જ શ્રેણીમાં આવતા શનિવારે રાજ્‍ય સરકારના ત્રણ કેબિનેટ મંત્રીઓની એક ઉચ્‍ચસ્‍તરીય ટીમ સાગબારાની મુલાકાતે જશે.

મળતી વિગતો અનુસાર, ત્રણ મંત્રીઓની આ ટીમ સ્‍થળ પર જઈને આંદોલનકારી આદિવાસી આગેવાનો અને સ્‍થાનિક નાગરિકો સાથે સીધી બેઠક યોજશે. જંગલ જમીન અધિકાર કાયદા હેઠળ બાકી રહેલા દાવાઓ, જમીનના માલિકી હક અને અન્‍ય પડતર પ્રશ્નો અંગે મંત્રીઓ સ્‍થળ પર જ રૂબરૂ રજૂઆતો સાંભળશે.

આંદોલનકારીઓની લાંબા સમયથી માંગ છે કે પરંપરાગત રીતે ખેડાણ કરતા આદિવાસીઓને તેમની જમીનના અધિકારો આપવામાં આવે અને વન વિભાગ દ્વારા કરવામાં આવતી હેરાનગતિ બંધ થાય.

સરકારના આ પગલાને આંદોલનને ઉકેલ તરફ લઈ જવાની એક મહત્‍વપૂર્ણ પહેલ તરીકે જોવામાં આવી રહી છે. સાગબારા અને આસપાસના ગ્રામીણ વિસ્‍તારોમાં આદિવાસીઓ મોટી સંખ્‍યામાં એકઠા થઈને પોતાની માંગણીઓ સંતોષવા માટે વિરોધ પ્રદર્શન કરી રહ્યા હતા.

ગાંધીનગરથી સીધા મંત્રીઓ સાગબારા પહોંચીને વાટાઘાટો કરશે તેવા સમાચાર મળતાં જ સ્‍થાનિક આદિવાસીઓમાં ઉકેલની આશા જાગી છે.

રાજ્‍ય સરકારનો ઉદ્દેશ્‍ય સ્‍થાનિક સ્‍તરે જ સંવાદ સાધીને આ સંવેદનશીલ મુદ્દાનો શાંતિપૂર્ણ અને કાયદાકીય રીતે યોગ્‍ય ઉકેલ લાવવાનો છે.

હવે શનિવારે યોજાનારી આ બેઠક પર સૌની નજર ટકેલી છે કે મંત્રીઓની ટીમ અને આદિવાસી આગેવાનો વચ્‍ચેની ચર્ચામાંથી શું સકારાત્‍મક પરિણામ બહાર આવે છે.