ગાંધીનગર:  ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ, ગાંધીનગર દ્વારા ફેબ્રુઆરી-માર્ચ ૨૦૨૬માં લેવાયેલ માધ્યમિક શાળાંત પ્રમાણપત્ર પરીક્ષા (એસ.એસ.સી.)નું સત્તાવાર પરિણામ આજે જાહેર કરવામાં આવ્યું છે. બોર્ડના અધ્યક્ષ મુકેશ પંડ્યા દ્વારા જાહેર કરાયેલા આંકડા મુજબ, આ વર્ષે નિયમિત પરીક્ષાર્થીઓનું કુલ પરિણામ ૮૩.૮૬ ટકા નોંધાયું છે, જે ગયા વર્ષના ૮૩.૦૮ ટકાની સરખામણીએ સાધારણ વધારો દર્શાવે છે.

 પરીક્ષાનું માળખું અને વ્યવસ્થા:

આ વર્ષે પરીક્ષા રાજ્યના ૮૭ ઝોનના ૧૦૦૬ કેન્દ્રો પર યોજાઈ હતી, જેમાં ૩૨૪૩ પરીક્ષા સ્થળો અને ૩૧૦૦૧ પરીક્ષાખંડોનો ઉપયોગ કરવામાં આવ્યો હતો. પ્રશ્નપત્રોની સુરક્ષા માટે પ્રથમ વખત ‘Paper Box Authentication and Tracking Application’નો ઉપયોગ કરી સમગ્ર પ્રક્રિયાને પારદર્શક બનાવવામાં આવી હતી.

 પરિણામના મુખ્ય આંકડા અને જાતિવાર વિશ્લેષણ:

 *  નિયમિત પરીક્ષાર્થીઓ:  કુલ ૭,૬૯,૯૯૩ વિદ્યાર્થીઓ નોંધાયા હતા, જેમાંથી ૭,૫૬,૩૯૨ ઉપસ્થિત રહ્યા અને ૬,૩૪,૩૨૭ પરીક્ષાર્થીઓ ઉત્તીર્ણ થયા છે.

 *  કન્યાઓ વિરુદ્ધ કુમારો:  દર વર્ષની જેમ આ વર્ષે પણ કન્યાઓએ બાજી મારી છે. કન્યાઓનું પરિણામ ૮૮.૨૮ ટકા રહ્યું છે, જ્યારે કુમારોનું પરિણામ ૮૦.૧૨ ટકા નોંધાયું છે.

 *  રિપીટર અને અન્ય:  રિપીટર પરીક્ષાર્થીઓનું પરિણામ ૩૩.૫૩ ટકા અને ગુજરાત સ્ટેટ ઓપન સ્કૂલ (GSOS)ના વિદ્યાર્થીઓનું પરિણામ ૨૮.૨૨ ટકા આવ્યું છે.

 *  દિવ્યાંગ વિદ્યાર્થીઓ:  ૪૭૩૮ દિવ્યાંગ પરીક્ષાર્થીઓમાંથી ૨૬૬૮ ઉમેદવારો પ્રમાણપત્રને પાત્ર ઠર્યા છે. તેઓ માટે ૨૦ ટકા પાસિંગ સ્ટાન્ડર્ડ રાખવામાં આવ્યું હતું.

 કેન્દ્ર અને જિલ્લાવાર વિગતો:

રાજ્યમાં ગાંધીનગર જિલ્લાનું આજોલ કેન્દ્ર ૧૦૦ ટકા પરિણામ સાથે પ્રથમ ક્રમે રહ્યું છે, જ્યારે દાહોદ જિલ્લાનું મુનખોસલા કેન્દ્ર ૩૩.૭૪ ટકા પરિણામ સાથે સૌથી છેલ્લે રહ્યું છે. જિલ્લાવાર જોતા, નર્મદા જિલ્લો ૯૦.૮૫ ટકા પરિણામ સાથે રાજ્યમાં સૌથી વધુ સફળ રહ્યો છે, જ્યારે પંચમહાલ જિલ્લો ૭૬.૪૨ ટકા સાથે ન્યૂનતમ સ્તરે રહ્યો છે. રાજ્યની ૧૬૯૭ શાળાઓએ ૧૦૦ ટકા પરિણામ પ્રાપ્ત કર્યું છે, જ્યારે ૩૯ શાળાઓનું પરિણામ શૂન્ય ટકા રહ્યું છે.

 ગ્રેડિંગ અને વિષયવાર દેખાવ:

વિદ્યાર્થીઓના ગ્રેડિંગમાં ૩૫,૫૦૮ વિદ્યાર્થીઓએ A1 ગ્રેડ અને ૯૦,૮૬૩ વિદ્યાર્થીઓએ A2 ગ્રેડ મેળવ્યો છે. વિષયવાર પરિણામમાં સ્ટાન્ડર્ડ મેથ્સનું પરિણામ સૌથી વધુ ૯૯.૬૩ ટકા નોંધાયું છે. ગુજરાતી પ્રથમ ભાષામાં ૯૨.૨૨ ટકા અને વિજ્ઞાનમાં ૮૭.૪૮ ટકા વિદ્યાર્થીઓ સફળ થયા છે.

 ગેરરીતિ અને જેલના કેદીઓ:

પરીક્ષા દરમિયાન ગેરરીતિના ૦૫ કેસ નોંધાયા હતા, જ્યારે CCTV ફૂટેજના આધારે ૨૩૩ પરીક્ષાર્થીઓ સામે કાર્યવાહી કરવામાં આવી છે. ખાસ નોંધનીય છે કે, રાજ્યની વિવિધ જેલોમાં રહેલા ૬૧ બંદીવાન પરીક્ષાર્થીઓમાંથી ૫૧ પરીક્ષાર્થીઓ પરીક્ષામાં બેઠા હતા.

 નાસીપાસ થયેલા વિદ્યાર્થીઓ માટે તક:

અધ્યક્ષ મુકેશ પંડ્યાએ જણાવ્યું હતું કે જે વિદ્યાર્થીઓ સફળ નથી થયા તેઓએ નિરાશ થવાની જરૂર નથી. જૂન-૨૦૨૬માં યોજાનારી પૂરક પરીક્ષામાં વિદ્યાર્થીઓને ‘Best of Two’નો લાભ મળશે, જેમાં મુખ્ય પરીક્ષા અને પૂરક પરીક્ષા એ બંનેમાંથી જે શ્રેષ્ઠ પરિણામ હશે તે માન્ય રાખવામાં આવશે. ગુણ ચકાસણી કે દફતર ચકાસણી માટેની અરજીઓ બોર્ડની વેબસાઈટ www.gseb.org પર ઓનલાઈન કરવાની રહેશે.

આ સમગ્ર પરીક્ષા કામગીરીમાં મદદનીશ સચિવ જી. એફ. લુહાર, શ્રીમતી ડૉ. મિનેશ પટેલ, નાયબ નિયામક જે. કે. પટેલ અને નાયબ અધ્યક્ષ એ. બી. રાદડિયાએ મહત્વની ભૂમિકા ભજવી હતી.

 

રીઝલ્ટ ની વિગતવાર માહિતી જોવા માટે આ સાથે આપેલ પીડીએફ ફાઈલ ડાઉનલોડ કરો...