અમદાવાદ : અમદાવાદ શહેરના પૂર્વ વિસ્તારમાં આવેલા મેઘાણીનગર પંથકમાંથી એક અત્યંત ચોંકાવનારી અને કાળજું કંપાવી દે તેવી ઘટના પ્રકાશમાં આવી છે. મળતી માહિતી મુજબ, મેઘાણીનગર વિસ્તારમાં રહેતી અને ધોરણ ૧૨માં અભ્યાસ કરતી એક ૧૭ વર્ષીય સગીરાએ પોતાના જ ઘરે અગમ્ય કારણોસર આપઘાત કરી લીધો છે. માસૂમ દીકરીએ અચાનક આ પ્રકારનું અંતિમ પગલું ભરી લેતા આસપાસના રહીશો અને સ્થાનિકોમાં ભારે અરેરાટી વ્યાપી ગઈ છે અને સમગ્ર પંથક શોકમાં ડૂબી ગયો છે.

પોલીસની પ્રાથમિક તપાસમાં આપઘાત કરનાર માસૂમ સગીરાની ઓળખ હિરલ પરમાર તરીકે થઈ છે. ઘટનાની વિગતવાર માહિતી અનુસાર, હિરલના પિતાએ કોઈ સામાન્ય બાબતે તેને કડક શબ્દોમાં ઠપકો આપ્યો હતો. પિતા દ્વારા આપવામાં આવેલો આ ઠપકો હિરલને મનમાં ખૂબ જ લાગી આવ્યો હતો. આ સિવાય પરિવારમાં છેલ્લા કેટલાક સમયથી આંતરિક ઘરકંકાસ પણ ચાલતો હોવાનું સામે આવ્યું છે. આ પારિવારિક માનસિક તણાવ અને પિતાના ઠપકાના આઘાતમાં સગીરાએ જીવન ટૂંકાવવાનું આત્મઘાતી પગલું ભર્યું હતું.

આ ચકચારી ઘટના અંગે સ્થાનિક નાગરિકો દ્વારા કંટ્રોલ રૃમમાં જાણ કરવામાં આવતા જ મેઘાણીનગર પોલીસ સ્ટેશનનો મોટો કાફલો તાબડતોબ ઘટનાસ્થળે દોડી આવ્યો હતો. પોલીસે ઘટનાસ્થળનું ઝીણવટભર્યું પંચનામું કરીને સગીરાના મૃતદેહને કાયદેસરના પોસ્ટમોર્ટમ અર્થે સિવિલ હોસ્પિટલ ખાતે ખસેડ્યો છે.

મેઘાણીનગર પોલીસે આ સમગ્ર મામલે હાલ પૂરતો અકસ્માત મોત (AD) નો ગુનો નોંધી, પરિવારના સભ્યોના નિવેદનો લેવાની અને આપઘાત પાછળના ચોક્કસ કારણો શોધવા માટેની આગળની તપાસ તેજ કરી દીધી છે.