અમદાવાદ : અમદાવાદવાસીઓ માટે આરોગ્ય ક્ષેત્રે અત્યંત રાહત અને આનંદના સમાચાર સામે આવ્યા છે, જ્યાં અમદાવાદ ખાતે રૂ. 223 કરોડના મસમોટા ખર્ચે આકાર લેનાર અત્યાધુનિક 'ઇન્સ્ટિટ્યૂટ ઑફ ન્યૂરોસાયન્સ એન્ડ રિસર્ચ સેન્ટર'નું ખાતમુહૂર્ત કરવામાં આવ્યું છે. રાજ્યના ખૂણે-ખૂણા સુધી ગુણવત્તાયુક્ત સ્વાસ્થ્ય સેવાઓ પહોંચાડવાના અટલ સંકલ્પ સાથે મુખ્યમંત્રી ભૂપેન્દ્રભાઈ પટેલના વરદ હસ્તે આ ભવ્ય સંસ્થાસહિત રૂ. 500 કરોડથી પણ વધુના વિવિધ આરોગ્યલક્ષી વિકાસ પ્રકલ્પોનું ભવ્ય લોકાર્પણ અને ખાતમુહૂર્ત કરવામાં આવ્યું હતું. આ ગરિમાપૂર્ણ અવસરે આરોગ્ય રાજ્યમંત્રી પ્રફુલ પાનસેરીયા, શહેરી વિકાસ રાજ્યમંત્રી દર્શનાબેન વાઘેલા સહિતના અન્ય અગ્રણી મહાનુભાવોની ખાસ ઉપસ્થિતિ રહી હતી.

આ પ્રસંગે ઉપસ્થિત જનમેદનીને સંબોધતા મુખ્યમંત્રી ભૂપેન્દ્ર પટેલે જણાવ્યું હતું કે, આજે અમદાવાદ ખાતે વિવિધ આરોગ્યલક્ષી પ્રકલ્પોના શુભારંભ થકી 'સર્વે ભવન્તુ સુખિનઃ સર્વે સન્તુ નિરામયાઃ' ની ભારતીય સનાતન ભાવના સંપૂર્ણપણે સાર્થક થઈ છે. તેમણે વડાપ્રધાન નરેન્દ્રભાઈ મોદીના સુશાસનના સફળ 25 વર્ષમાં એફોર્ડેબલ હેલ્થ કેર સિસ્ટમ દ્વારા આરોગ્ય ક્ષેત્રે આવેલા આમૂલ પરિવર્તન અને ટ્રાફોર્મેશન અંગે ઉપસ્થિત સૌ નાગરિકોને વિગતવાર માહિતગાર કર્યા હતા. રાજ્યમાં તબીબી માળખાને વધુ મજબૂત કરવા માટે સરકાર સતત કટિબદ્ધ હોવાનું તેમણે ઉમેર્યું હતું.

મુખ્યમંત્રીએ રાજ્યના વિવિધ જિલ્લાઓમાં તાજેતરમાં શરૂ કરાયેલી આરોગ્ય સંસ્થાઓના શુભારંભ અંગે માહિતી આપતા જણાવ્યું હતું કે, રાજ્યના સામાન્ય નાગરિકોને આધુનિક સારવાર માટે દૂર-દૂર સુધી ધક્કા ખાવા ન પડે તેવો રાજ્ય સરકારનો સ્પષ્ટ અભિગમ છે. છેવાડાના માનવી સુધી ઉત્તમ અને શ્રેષ્ઠ આરોગ્ય સેવાઓ પહોંચાડીને 'સ્વસ્થ ગુજરાતથી વિકસિત ગુજરાત' બનાવવાનો મક્કમ નિર્ધાર તેમણે આ અવસરે વ્યક્ત કર્યો હતો. આ અત્યાધુનિક ન્યૂરોસાયન્સ સેન્ટર શરૂ થવાથી મગજ અને કરોડરજ્જુના જટિલ રોગોથી પીડાતા દર્દીઓને અમદાવાદમાં જ વિશ્વ કક્ષાની તબીબી સારવાર મળી રહેશે.

અગાઉ પણ રાજ્ય સરકાર દ્વારા અમદાવાદ અને અન્ય મહાનગરોમાં સુપર સ્પેશિયાલિટી હોસ્પિટલોના નિર્માણ માટે મોટા પ્રોજેક્ટ્સ હાથ ધરવામાં આવ્યા છે, જેના ભાગરૂપે આ ન્યૂરોસાયન્સ રિસર્ચ સેન્ટર એક નવું સીમાચિહ્ન સાબિત થશે. હાલમાં આ પ્રકલ્પના ખાતમુહૂર્ત બાદ નિર્માણ કાર્ય યુદ્ધના ધોરણે શરૂ કરી દેવામાં આવ્યું છે. આગામી સમયમાં આ સંસ્થા પૂર્ણ થયા બાદ ગુજરાત મેડિકલ હબ તરીકે વધુ મજબૂત બનશે અને વહીવટીતંત્ર દ્વારા તબીબી ક્ષેત્રે ડેટા અને રિસર્ચની કામગીરીને વધુ વેગ આપવામાં આવશે.