નવસારી : દક્ષિણ ગુજરાતમાં મુસળધાર વરસી રહેલા ચોમાસી વરસાદ વચ્ચે નવસારી તાલુકાના પેરા ગામેથી એક અત્યંત કરુણ અને ભયાનક દુર્ઘટના સામે આવી છે. ગામની જૂની સોસાયટી ફળિયામાં આવેલું ૧૫ વર્ષ જૂનું સરકારી આવાસ મકાન વહેલી સવારે ભારે વરસાદના કારણે અચાનક ધડાકાભેર તૂટીને જમીનદોસ્ત થઈ ગયું હતું. આ ભયાનક હોનારતમાં મકાનના કાટમાળ નીચે એક જ પરિવારના ૮ સભ્યો દટાઈ જતાં સમગ્ર વિસ્તારમાં ભારે અફરાતફરી અને ચીસિયારીઓ મચી ગઈ હતી.

ગ્રામજનોએ દટાયેલા લોકોને બહાર કાઢ્યા, ૩ મહિલાઓને ગંભીર ઈજાઓ

ઘટના બની તે સમયે શ્રમજીવી મહેશભાઈ ભીખાભાઈ રાઠોડનો પરિવાર ઘરની અંદર હતો. અવાજ સાંભળી દોડી આવેલા સ્થાનિક ગ્રામજનોએ ભારે જહેમત બાદ કાટમાળ નીચે દટાયેલા તમામ ૮ સભ્યોને બહાર કાઢ્યા હતા. આ અકસ્માતમાં મહેશભાઈના માતા કાંતાબેન (ઉ.વ. ૬૭, પગમાં ફેક્ચર), પત્ની કવિતાબેન (ઉ.વ. ૩૩, કમરમાં ફેક્ચર) અને બહેન વસુબેન (ઉ.વ. ૪૨, માથામાં ઈજા) ગંભીર રીતે ઈજાગ્રસ્ત થયા હતા, જેમને તાત્કાલિક સારવાર અર્થે નવસારી સિવિલ હોસ્પિટલમાં ખસેડાયા છે. જ્યારે મહેશભાઈ સહિત પરિવારના અન્ય ૫ સભ્યોનો ચમત્કારિક બચાવ થયો હતો.

તંત્રની બેદરકારી સામે સ્થાનિકોમાં પ્રચંડ રોષ

દર વર્ષે ચોમાસામાં જૂના અને જર્જરિત સરકારી આવાસો તૂટી પડવાની ઘટનાઓ સામે આવે છે. ચોમાસા પૂર્વે સરકાર કે તંત્ર દ્વારા વર્ષો જૂના આવાસોનું કોઈ જ રિનોવેશન કે મરામત કાર્ય કરવામાં આવતું ન હોવાથી સ્થાનિક શ્રમજીવી પરિવારજનો અને ગ્રામજનોમાં વહીવટી તંત્રની બેદરકારી સામે ભારે વિરોધ અને રોષ જોવા મળી રહ્યો છે.

નવસારી જિલ્લામાં ચિખલીમાં ૨.૪૮ ઈંચ વરસાદ, ઓલપાડમાં ૩ ઈંચ ખાબક્યો

શનિવારે સવારે ૬ થી બપોરે ૪ વાગ્યા દરમિયાન નવસારી જિલ્લામાં મેઘરાજાએ સાર્વત્રિક હાજરી નોંધાવી હતી. જિલ્લામાં તાલુકાવાર વરસાદની વિગત નીચે મુજબ છે:

· ચિખલી: ૨.૪૮ ઈંચ (૬૩ મીમી - જિલ્લામાં સૌથી વધુ)

· નવસારી અને ખેરગામ: ૧.૮૯ ઈંચ (૪૮ મીમી)

· વાંસદા: ૧.૫૭ ઈંચ (૪૦ મીમી)

· જલાલપોર: ૧.૩૮ ઈંચ (૩૫ મીમી)

· ગણદેવી: ૧.૩૦ ઈંચ (૩૩ મીમી)

આ ઉપરાંત સમગ્ર દક્ષિણ ગુજરાતના અન્ય વિસ્તારોમાં પણ જોરદાર વરસાદ રહ્યો હતો; જેમાં સુરતના ઓલપાડમાં ૨.૯૫ ઈંચ, ભરૂચના ઝઘડિયામાં ૨.૪૦ ઈંચ અને વલસાડના નાનાપોધામાં ૨.૧૩ ઈંચ વરસાદ નોંધાયો છે.