કેન્દ્રશાસિત પ્રદેશ દીવના વણાકબારા દરિયાકાંઠે એક અત્યંત હૃદયદ્રાવક ઘટના સામે આવી છે. માછીમારી અર્થે ગયેલી એક બોટમાંથી અચાનક સંતુલન ગુમાવીને દરિયામાં ખાબકતાં એક નિર્દોષ ખલાસીનું ડૂબી જવાથી મોત નીપજ્યું છે. આ બનાવને પગલે સાગરખેડૂતો અને સ્થાનિક માછીમાર સમાજમાં ભારે શોકની લાગણી પ્રસરી ગઈ છે.

પ્રાપ્ત વિગતો અનુસાર, વણાકબારા બંદરેથી માછીમારી માટે દરિયામાં ગયેલી 'શ્રી ગજાનંદ' નામની ફિશિંગ બોટમાં આ ગંભીર અકસ્માત સર્જાયો હતો. બોટ જ્યારે દરિયામાં માછીમારીની કામગીરીમાં વ્યસ્ત હતી, ત્યારે અચાનક મોજાંના જોર કે પગ લપસવાને કારણે બોટ પર કામ કરી રહેલા ખલાસી દરિયાના ઊંડા પાણીમાં પટકાયા હતા. સાથી ખલાસીઓ કંઈ સમજે કે બચાવ કામગીરી કરે તે પહેલાં જ તેઓ દરિયાના પ્રવાહમાં લાપતા થઈ ગયા હતા.

આ દુર્ઘટનામાં કાળનો કોળિયો બનેલા ખલાસીની ઓળખ ગીર સોમનાથ જિલ્લાના જુડવડલી ગામના વતની 43 વર્ષીય નારણભાઇ તરીકે થઈ છે. પરિવારનું ગુજરાન ચલાવવા માટે દરિયો ખેડવા નીકળેલા પરિવારના મોભીના આકસ્મિક મોતથી જુડવડલી ગામ અને પરિવારમાં આક્રંદ છવાઈ ગયો છે.

બનાવ બન્યા બાદ અન્ય ખલાસીઓ અને સ્થાનિક બોટચાલકો દ્વારા તાત્કાલિક દરિયામાં સઘન શોધખોળ હાથ ધરવામાં આવી હતી. રાત્રિના અંધકાર વચ્ચે લાંબી શોધખોળ છતાં તેમનો કોઈ પત્તો મળ્યો ન હતો. જોકે, વહેલી સવારે દરિયાના પાણીમાંથી નારણભાઇનો મૃતદેહ મળી આવતાં સાથી ખલાસીઓએ ભારે હૃદયે તેને બોટ મારફતે કાંઠે પહોંચાડ્યો હતો.

ઘટનાની જાણ સ્થાનિક પ્રશાસન અને મરીન પોલીસને કરવામાં આવી હતી. પોલીસે સ્થળ પર પહોંચી પંચનામું કર્યું હતું અને મૃતદેહને દીવની સરકારી હોસ્પિટલ ખાતે પોસ્ટમોર્ટમ અર્થે ખસેડ્યો હતો. પીએમની પ્રક્રિયા પૂર્ણ થયા બાદ મૃતદેહ પરિજનોને સોંપવામાં આવ્યો હતો પોલીસે અકસ્માતે મોતનો ગુનો નોંધી આગળની કાયદેસરની તપાસ હાથ ધરી છે.