રાજકોટઃ ગુજરાતની લોકગાયિકા કિંજલ રબારીના કથિત અપહરણ અંગે સર્જાયેલા વિવાદ વચ્‍ચે પાટણ જિલ્લાના રાધનપુર તાલુકાના સિનાડ ગામે પોલીસ ઉપનિરીક્ષક ઉપર હુમલાની ઘટના સામે આવી છે. કાયદો અને વ્‍યવસ્‍થા જાળવવા તૈનાત પોલીસ વચ્‍ચે ગામના લાખણેશ્વર મહાદેવ મંદિરે પચાસથી વધુ લોકોનું ટોળું પહોંચતાં બોલાચાલી અને ઝપાઝપી થઈ હતી.

ઉશ્‍કેરાયેલા ટોળાએ રાધનપુરના પોલીસ ઉપનિરીક્ષક એચ. વી. ચૌધરી ઉપર હુમલો કરતાં તેમને હાથના ભાગે ઈજા પહોંચી હતી. બનાવ બાદ પાટણની સ્‍થાનિક ગુના શાખા, વિશેષ કાર્યવાહી જૂથ અને અન્‍ય પોલીસ મથકોનો વધારાનો કાફલો સિનાડમાં ઉતારવામાં આવ્‍યો હતો. કોઈ અનિચ્‍છનીય ઘટના ન બને તે માટે ગામ અને મંદિર આસપાસ ચુસ્‍ત બંદોબસ્‍ત ગોઠવાયો છે.

પોલીસ અધિકારી ઉપર હુમલો કરનારા લોકોની ઓળખ કરી ગુનો નોંધવા અને કાયદેસરની કાર્યવાહી કરવાની પ્રક્રિયા હાથ ધરાઈ છે. સામાજિક તંગદિલી ન વધે તે માટે પોલીસ દ્વારા ગ્રામજનો સાથે સંવાદનો પ્રયાસ પણ કરવામાં આવી રહ્યો છે.

બીજી તરફ, કિંજલ રબારીએ પોતાનું અપહરણ થયું હોવાના દાવાને નકારી જણાવ્‍યું છે કે તે પોતાની મરજીથી ગઈ હતી.  તેના નિવેદન પછી કથિત અપહરણના અગાઉના દાવા અંગે નવી સ્‍થિતિ સર્જાઈ છે. પોલીસ સમગ્ર ઘટનાક્રમ, રજૂઆતો અને ઉપલબ્‍ધ પુરાવાની તપાસ કરી રહી છે.