​અમદાવાદ:અમદાવાદના પશ્ચિમ વિસ્તારમાં આવેલા બોપલની એક પ્રતિષ્ઠિત સ્કૂલમાં માસૂમ વિદ્યાર્થીઓની સુરક્ષા સામે ગંભીર સવાલો ઊભા કરતી અત્યંત આઘાતજનક ઘટના સામે આવી છે. બોપલ વિસ્તારમાં આવેલી જાણીતી એલ.ડી.આર. ઇન્ટરનેશનલ સ્કૂલમાં પ્રી-પ્રાયમરી વિભાગમાં અભ્યાસ કરતી માત્ર ૫ વર્ષની માસૂમ બાળકી સાથે શાળાના જ એક સફાઈ કર્મચારી દ્વારા શારીરિક અડપલાં કરવામાં આવ્યા હોવાની સનસનાટીપૂર્ણ વિગતો બહાર આવતાં સમગ્ર પંથકમાં ભારે રોષ અને ચિંતાની લાગણી વ્યાપી ગઈ છે. આ ચકચારી મામલે પીડિત બાળકીના વાલીઓની ફરિયાદના આધારે બોપલ પોલીસ સ્ટેશનમાં ગુનો દાખલ કરવામાં આવ્યો છે અને પોલીસે ત્વરિત કાર્યવાહી હાથ ધરીને આરોપી સફાઈ કામદારની ધરપકડ કરી લીધી છે.

​પ્રાપ્ત વિગતો અનુસાર, બોપલની એલ.ડી.આર. ઇન્ટરનેશનલ સ્કૂલમાં પ્રી-પ્રાયમરીમાં ભણતી એક નાની બાળકીએ ઘરે જઈને પોતાની સાથે શાળાના પરિસરમાં બનેલી અણછાજતી ઘટના અંગે માતા-પિતાને વાકેફ કર્યા હતા. બાળકીની આપવીતી સાંભળીને ચોંકી ઉઠેલા વાલીઓએ તુરંત જ આ ગંભીર બાબત અંગે શાળાના સંચાલકો સમક્ષ ઉગ્ર રજૂઆત કરી હતી. શાળા કેમ્પસની અંદર જ બાળકી સાથે થયેલા આ દુર્વ્યવહારના મામલે વાલીઓએ ન્યાયની માંગ સાથે બોપલ પોલીસ મથકનો સંપર્ક સાધ્યો હતો, જ્યાં બાળકીની સુરક્ષા અને ગરિમાને ઠેસ પહોંચાડવા બદલ ગુનો નોંધવામાં આવ્યો હતો.

​આ ઘટના અંગે શાળા સંચાલકો અને ટ્રસ્ટ મંડળે જણાવ્યું હતું કે, સમગ્ર મામલો સામે આવતાની સાથે જ શાળા પ્રશાસન દ્વારા તાત્કાલિક ધોરણે કડક પગલાં ભરવામાં આવ્યા છે. જે કર્મચારી પર આ શરમજનક કૃત્યનો આક્ષેપ લાગ્યો છે, તેને તાત્કાલિક અસરથી નોકરીમાંથી સસ્પેન્ડ કરી દેવામાં આવ્યો છે. શાળાના સંચાલકોના જણાવ્યા મુજબ, આ શંકાસ્પદ સફાઈ કર્મચારી આધેડ ઉંમરનો છે અને છેલ્લા ત્રણેક વર્ષથી તેનો આખો પરિવાર આ જ શાળામાં સફાઈ અને અન્ય કામકાજ સાથે જોડાયેલો હતો. શાળાના સત્તાધીશોએ પોતે પણ પોલીસને સમગ્ર ઘટનાની વિગતો આપી તપાસમાં સંપૂર્ણ સહયોગ આપવાની ખાતરી આપી છે.

​બીજી તરફ, માસૂમ બાળકી સાથે શારીરિક અડપલાં થવાની ફરિયાદ મળતા જ બોપલ પોલીસ એક્શન મોડમાં આવી ગઈ હતી. પોલીસે તાત્કાલિક ધોરણે પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સીસ (POCSO) એક્ટ તેમજ ભારતીય ન્યાય સંહિતા (BNS) ની સંબંધિત કલમો હેઠળ ગુનો નોંધી આગળની તપાસ હાથ ધરી હતી. પોલીસે શંકાસ્પદ કર્મચારીને તાત્કાલિક રાઉન્ડ અપ કરીને સઘન પૂછપરછ હાથ ધરી હતી અને ત્યારબાદ તેની સત્તાવાર ધરપકડ કરી કાયદેસરની કાર્યવાહી આગળ ધપાવી છે. વિદ્યાના ધામ સમાન સ્કૂલના જ જવાબદાર કર્મચારી દ્વારા આવી નિંદનીય હરકત કરવામાં આવતા વાલી મંડળોમાં પણ શાળા કેમ્પસમાં બાળકોની સુરક્ષાને લઈને વ્યાપક ચિંતા અને આક્રોશ જોવા મળી રહ્યો છે.