હિંમતનગરના પાણપુર પાટીયા પાસે RTO ઓફિસ નજીક આવેલા એક કેળાના કોલ્ડ સ્ટોરેજમાં આજે રાત્રે અચાનક આગ લાગી હતી. આગ એટલી તીવ્ર હતી કે દૂર-દૂર સુધી ધુમાડાના કાળા ગોટેગોટા આકાશમાં દેખાયા હતા. આ ઘટનાને કારણે આસપાસના વિસ્તારોમાં અફરાતફરીનો માહોલ સર્જાયો હતો..

આગની જાણ થતાં જ હિંમતનગર ફાયર બ્રિગેડની ટીમ તાત્કાલિક ઘટનાસ્થળે પહોંચી ગઈ હતી. આગ પર કાબૂ મેળવવા માટે પાણીનો સતત મારો ચલાવવામાં આવી રહ્યો છે. ફાયર વિભાગની ટીમ આગ વધુ ન ફેલાય તે માટે ભારે પ્રયાસ કરી રહી છે.

આગ કયા કારણોસર લાગી તે હજુ સુધી સ્પષ્ટ નથી. પ્રાથમિક તપાસમાં શોર્ટ સર્કિટના કારણે આ ઘટના બની હોવાની શક્યતા વ્યક્ત કરવામાં આવી રહી છે. ફાયર વિભાગ અને સ્થાનિક તંત્ર દ્વારા આગ પર સંપૂર્ણ કાબૂ મેળવ્યા બાદ જ નુકસાન અને આગના સાચા કારણની વિગતો સામે આવશે.