અમદાવાદઃ અમદાવાદ જિલ્લાના ધોળકા શહેરમાંથી અત્યંત શરમનાક ઘટના સામે આવી છે. પોલીસે એક સરકારી શાળાના કમ્પ્યુટર રૂમમાં ૧૩ વર્ષીય સગીર વિદ્યાર્થીને અડપલાં કરવાના ગંભીર આરોપમાં ૪૯ વર્ષીય સરકારી શાળાના શિક્ષકની ધરપકડ કરી છે. કામાંધ બનેલા શિક્ષકે આ ઘટના અંગે કોઈને જાણ કરવા પર સગીરને જાનથી મારી નાખવાની ધમકી પણ આપી હતી.

મળતી માહિતી અનુસાર, ધોળકા શહેરમાં આવેલી સરકારી શાળામાં શિક્ષક તરીકે ફરજ બજાવતો ૪૯ વર્ષીય વિજયકુમાર સોલંકીએ ૧૭મી જૂનના રોજ ૧૩ વર્ષીય વિદ્યાર્થીને ચાવી લાવવાના બહાને સ્કૂલના કમ્પ્યુટર રૂમમાં લલચાવીને લઈ ગયો હતો. રૂમની અંદર જઈ નરાધમ શિક્ષકે વિદ્યાર્થી સાથે અડપલાં શરૂ કરી તેનું જાતીય શોષણ કરવાનો પ્રયાસ કર્યો હતો. જોકે, ભયભીત થયેલો સગીર ગમે તેમ કરીને શિક્ષકની પકડમાંથી છટકીને ભાગી નીકળ્યો હતો.

વિદ્યાર્થી તેની પકડમાંથી ભાગી જતાં પકડાઈ જવાના ડરથી ગુસ્સે ભરાયેલા વિજયકુમારે સગીરને ધમકાવ્યો હતો. તેણે ધમકી આપી હતી કે, જો આ ઘટના વિશે તે કોઈને પણ વાત કરશે તો તેને જાનથી મારી નાખવામાં આવશે અને તેના ગંભીર પરિણામો ભોગવવા પડશે.

આ ઘટના બાદ સગીર વિદ્યાર્થીએ હિંમત ભેગી કરીને પોતાના પરિવારને આપવીતી જણાવી હતી. જેના પગલે ૧૯મી જૂનના રોજ સગીરના પરિવારે ધોળકા ટાઉન પોલીસ સ્ટેશનમાં નરાધમ શિક્ષક વિરુદ્ધ ગુનો નોંધાવ્યો હતો. પોલીસે સઘન તપાસ હાથ ધરી, પુરાવા એકત્રિત કરીને આરોપી શિક્ષક વિજયકુમાર સોલંકીની ધરપકડ કરી હતી. હાલ આ મામલે પોલીસે આરોપી વિરુદ્ધ જેલના સળિયા પાછળ ધકેલી આગળની કાર્યવાહી હાથ ધરી છે