વડોદરા :સમગ્ર વિશ્વ જ્યારે ‘આંતરરાષ્ટ્રીય યોગ દિવસ’ની ઉજવણીમાં લીન છે, ત્યારે સંસ્કારી નગરી વડોદરામાં વડોદરા શહેર પોલીસ દ્વારા એક અત્યંત અનોખી અને પ્રેરણાદાયી ઉજવણી કરવામાં આવી છે. સામાન્ય રીતે કાયદો અને વ્યવસ્થા જાળવવામાં વ્યસ્ત રહેતી પોલીસે આ વખતે શારીરિક અને માનસિક સ્વાસ્થ્યનો મજબૂત સંદેશ આપવા માટે ડિજિટલ અને કલાત્મક અભિગમ અપનાવ્યો હતો, જે સોશિયલ મીડિયા પર ભારે આકર્ષણનું કેન્દ્ર બન્યો છે.

વડોદરા પોલીસ વિભાગના અધિકારીઓ અને જવાનોએ યોગ દિવસ નિમિત્તે એકત્રિત થઈને મેદાન પર એક ભવ્ય અને શિસ્તબદ્ધ માનવ આકૃતિ (Human Formation) રચી હતી. આકાશી ડ્રોન ફૂટેજ નજારા  દ્વારા લેવાયેલી તસવીરો અને વીડિયોમાં પોલીસકર્મીઓ દ્વારા શિસ્તબદ્ધ રીતે રચાયેલું "YOGA DAY 2026" નું લખાણ અદ્ભુત અને મનમોહક દેખાતું હતું.  આ ભવ્ય આયોજનમાં વડોદરાના પોલીસ કમિશ્નર નરસિમ્હા કોમાર સહિતના ઉચ્ચ અધિકારીઓ અને મોટી સંખ્યામાં પોલીસ કર્મચારીઓએ ઉત્સાહભેર ભાગ લઈ વિવિધ આસનો અને પ્રાણાયામ કર્યા હતા.

આ પ્રસંગે પોલીસ કમિશ્નર નરસિમ્હા કોમારે એક પ્રેરણાદાયી સંદેશ આપતાં જણાવ્યું હતું કે, “સ્વાસ્થ્ય, સતર્કતા અને સુરક્ષા એ જ પોલીસનો યોગ મંત્ર છે.” તેમણે તમામ પોલીસકર્મીઓ અને નાગરિકોને તણાવમુક્ત અને સક્રિય જીવન જીવવા માટે યોગને પોતાના રોજિંદા જીવનનો અનિવાર્ય ભાગ બનાવવા ખાસ અપીલ કરી હતી. પોલીસનો આ સુંદર અને સકારાત્મક પ્રયાસ નાગરિકોમાં સ્વાસ્થ્ય પ્રત્યે જાગૃતિ ફેલાવવામાં મોખરે રહ્યો છે.