સુરત : સુરત રેલવે સ્ટેશન પર સુરક્ષા એજન્સીઓ દ્વારા ચલાવવામાં આવી રહેલા સઘન ચેકિંગ અને સૂરક્ષા અભિયાન દરમિયાન પોલીસને મોટી સફળતા સાંપડી છે. સુરત રેલવે SOGની NDPS ડેડિકેટેડ ટીમ દ્વારા “MISSION SAFE STATION” અંતર્ગત પ્લેટફોર્મ નંબર-૧ પર હાથ ધરાયેલા ચેકિંગ દરમિયાન શંકાસ્પદ હાલતમાં ફરતા એક ઈસમને ઝડપી પાડી તેની પાસેથી લાખો રૂપિયાની કિંમતનો નશીલો પદાર્થ (ગાંજો) જપ્ત કરવામાં આવ્યો છે.

પોલીસના જણાવ્યા અનુસાર, પકડાયેલા આરોપીની ઓળખ મસુકમ ખીરા (ઉંમર ૩૨ વર્ષ, રહે. બાલાંગીર, ઓડિશા) તરીકે થઈ છે. આરોપી ટ્રેન મારફતે ઓડિશાથી લાખો રૂપિયાનો ગાંજો લઈને સુરત આવ્યો હતો. રેલવે સ્ટેશનના પ્લેટફોર્મ નંબર-૧ પરથી બહાર નીકળતી વખતે પોલીસની નજરથી બચવાનો પ્રયાસ કરી રહેલા મસુકમ પર શંકા જતાં SOG ટીમે તેને રોકીને સઘન તલાશી લીધી હતી.

અત્તર અને એર ફ્રેશનરનો કીમિયો પણ નિષ્ફળ રહ્યો

તપાસ દરમિયાન આ કેસમાં એક અત્યંત ચોંકાવનારી વિગત સામે આવી છે. ટ્રેન મુસાફરી કે સ્ટેશન પર ચેકિંગ સમયે ગાંજાની તીવ્ર વાસ ન આવે અને કોઈને શંકા ન જાય તે માટે આરોપી અગાઉથી જ પૂરી તૈયારી કરીને આવ્યો હતો. તે બેગમાં રાખેલા ગાંજાની વાસ દબાવવા માટે સમયાંતરે અત્તરનો સ્પ્રે કરતો હતો અને બેગની અંદર એર ફ્રેશનર રાખીને જ ફરતો હતો. જોકે, સુરત રેલવે SOGની સતર્કતા સામે શાતિર આરોપીનો આ અનોખો કીમિયો કામ આવી શક્યો નહોતો.

રૂ. ૨.૦૨ લાખનો મુદ્દામાલ કબ્જે

પોલીસે આરોપીની બેગમાંથી કુલ ૩.૮૯૫ કિલોગ્રામ ગાંજો જપ્ત કર્યો છે, જેની બજાર કિંમત અંદાજે રૂ. ૧,૯૪,૭૫૦ આંકવામાં આવી છે. આ ઉપરાંત તેની પાસેથી મોબાઈલ ફોન, બેકપેક, અત્તર, એર ફ્રેશનર અને રોકડા રૂ. ૨,૪૦૦ મળીને કુલ રૂ. ૨,૦૨,૧૫૦નો મુદ્દામાલ કબ્જે કરવામાં આવ્યો છે. સુરત રેલવે પોલીસ સ્ટેશનમાં NDPS એક્ટની વિવિધ કલમો હેઠળ ગુનો નોંધી આરોપી સામે કાયદાકીય કાર્યવાહી હાથ ધરાઈ છે.