દાહોદ:શ્રદ્ધા અને આસ્થા સાથે પાવાગઢના દર્શન કરીને હરખભેર વતન પરત ફરી રહેલા પરિવારની ખુશીઓ માર્ગમાં જ માતમમાં ફેરવાઈ ગઈ છે. રવિવારે રજાના દિવસે શક્તિપીઠના દર્શન કરી પરત જઈ રહેલા મધ્યપ્રદેશના કૈડાવત ગામના શ્રદ્ધાળુ પરિવારને દાહોદના ભીટોડી હાઇવે પર કાળનો પંજો ભરખી ગયો હતો. રસ્તાની સાઈડમાં ઉભેલા એક કન્ટેનર પાછળ કાર ધડાકાભેર ઘૂસી જતાં સર્જાયેલા ગમખ્વાર અકસ્માતે ત્રણ નિર્દોષ બાળકોનો ભોગ લીધો છે.

પૂરપાટ ઝડપે જતી કાર કન્ટેનર પાછળ ઘૂસી ગઈ:

મધ્યપ્રદેશના કૈડાવત ગામનો આ શ્રદ્ધાળુ પરિવાર પાવાગઢ દર્શન કરીને પોતાની કારમાં પરત ફરી રહ્યો હતો. આ દરમિયાન ભીટોડી હાઇવે પરથી પસાર થતી વખતે રસ્તાની સાઈડમાં એક વિશાળ કન્ટેનર ટ્રક ઉભી હતી. પૂરપાટ ઝડપે આવી રહેલી કારના ચાલકે કાબૂ ગુમાવતા કાર સીધી જ કન્ટેનરની પાછળના ભાગે ધડાકાભેર અથડાઈ હતી. અકસ્માત એટલો જોરદાર હતો કે કારનો કચ્ચરઘાણ નીકળી ગયો હતો અને કારમાં સવાર લોકો લોહીલુહાણ હાલતમાં અંદર ફસાઈ ગયા હતા.

૩ નિર્દોષ બાળકોના મોતથી માતમ છવાયો:

આ ભયાનક દુર્ઘટનામાં ૩ નિર્દોષ બાળકોના ઘટનાસ્થળે જ અત્યંત કરુણ મોત નીપજ્યા હતા. જ્યારે પરિવારના અન્ય ૯ સભ્યોને નાની-મોટી ગંભીર ઈજાઓ પહોંચી હતી. અકસ્માતને પગલે હાઇવે પર લોકોના ટોળા ઉમટી પડ્યા હતા અને જોનારાના કાળજા કંપી ઉઠ્યા હતા. સ્થાનિક લોકો અને માર્ગ પરથી પસાર થતા અન્ય વાહનચાલકોએ તાત્કાલિક બચાવ કામગીરી શરૂ કરી હતી અને કારમાં ફસાયેલા લોકોને બહાર કાઢવામાં મદદ કરી હતી.

ઈજાગ્રસ્તોની હાલત ગંભીર:

ઘટનાની જાણ થતા જ દાહોદ પોલીસનો કાફલો સ્થળ પર પહોંચી ગયો હતો. પોલીસે ઈજાગ્રસ્તોને તાત્કાલિક નજીકની સરકારી હોસ્પિટલમાં સારવાર માટે ખસેડ્યા હતા, જ્યાં કેટલાક સભ્યોની હાલત અત્યંત નાજુક હોવાનું જાણવા મળી રહ્યું છે. પોલીસે ત્રણેય બાળકોના મૃતદેહોને પોસ્ટમોર્ટમ અર્થે મોકલી આપી અકસ્માત અંગે કાયદેસરની તપાસ હાથ ધરી છે.

હાઇવે પર પાર્કિંગ મુદ્દે ફરી ઉઠ્યા સવાલ:

હાઇવે પર અસ્તવ્યસ્ત રીતે પાર્ક કરવામાં આવતા મોટા વાહનો નિર્દોષ લોકો માટે જીવલેણ સાબિત થઈ રહ્યા છે. આ ઘટનામાં પણ રસ્તાની સાઈડમાં ઉભેલા કન્ટેનરને કારણે સર્જાયેલા અકસ્માતે ફરી એકવાર વાહનચાલકોની સુરક્ષા સામે ગંભીર સવાલો ઉભા કર્યા છે. દર્શનના હરખ સાથે ઘરે જઈ રહેલા પરિવારમાં આ અકસ્માતને કારણે કાયમી શોકનું મોજું ફરી વળ્યું છે.