અમદાવાદ, તા. ૧૨ : ગુજરાતમાં લગભગ ત્રણ સપ્તાહથી નબળી રહેલી ચોમાસાની ગતિવિધિ ફરી સક્રિય થવાના સંકેતો મળ્યા છે. ભારતીય હવામાન વિભાગે આજે ગુજરાત પ્રદેશમાં છૂટાછવાયા સ્થળે ભારે વરસાદ તેમજ ગાજવીજ અને પવનની આગાહી કરી છે. સૌરાષ્ટ્ર અને કચ્છમાં આજે ગાજવીજ સાથે વરસાદી ઝાપટાં પડી શકે છે.

દક્ષિણ ગુજરાતમાં સુરત સહિતના વિસ્તારોમાં વરસાદ સાથે ભારે વરસાદની ચેતવણી આપવામાં આવી છે. અમદાવાદમાં ગાજવીજ સાથે વરસાદ અને કલાકના ત્રીસથી ચાલીસ કિલોમીટરની ઝડપે પવન ફૂંકાવાની શક્યતા છે. તેર સપ્ટેમ્બરે ગુજરાત પ્રદેશમાં અતિભારે તથા સૌરાષ્ટ્ર-કચ્છમાં ભારે વરસાદની સંભાવના છે. ચૌદ સપ્ટેમ્બરે બંને વિસ્તારોમાં અતિભારે વરસાદની ચેતવણી આપવામાં આવી છે.

દેશના અન્ય ભાગોમાં પણ ઉત્તરાખંડ, મધ્યપ્રદેશ, મહારાષ્ટ્ર, કોંકણ, ગોવા, છત્તીસગઢ, ઓડિશા, તેલંગાણા અને પશ્ચિમ બંગાળમાં વરસાદી માહોલ રહેવાની શક્યતા છે. વીજળી અને અચાનક પવન દરમિયાન ખુલ્લાં સ્થળો, વૃક્ષો તથા વીજ થાંભલાથી દૂર રહેવા જણાવાયું છે.