અમદાવાદ  : અમદાવાદ શહેરના અમરાઈવાડી પોલીસ સ્ટેશન વિસ્તારમાં એન્ટી કરપ્શન બ્યુરો (ACB) એ સફળ ટ્રેપ ગોઠવીને લાંચના નેટવર્કનો પર્દાફાશ કર્યો છે. કોર્ટના વોરંટની બજવણી કરવા જેવી કાયદેસરની કામગીરી કરવા માટે લાંચ માંગનાર હેડ કોન્સ્ટેબલ, હોમગાર્ડ અને નાણાં સ્વીકારનાર ખાનગી વ્યક્તિ વિરુદ્ધ ગુનો દાખલ કરવામાં આવ્યો છે.

 ઘટનાની વિગત અને લાંચની માંગણી:

ફરિયાદીના સગાએ લાલદરવાજાની નેગોશિયેબલ કોર્ટમાં નોંધાવેલી ફરિયાદ અંતર્ગત કલમ-૧૩૮ મુજબના ત્રણ વોરંટ ઈશ્યુ થયા હતા. આ વોરંટની બજવણી કરાવવા માટે ફરિયાદી અમરાઈવાડી પોલીસ સ્ટેશન ખાતે ગયા હતા. ત્યાં ફરજ પરના અનાર્મ હેડ કોન્સ્ટેબલ કિશનકુમાર કાનદાશ અગ્રાવત અને હોમગાર્ડ કેતન જોશી ઉર્ફે સોનુએ વોરંટની બજવણી કરવાના બદલામાં ૩,૦૦૦ રૂપિયાની લાંચની માંગણી કરી હતી. આ લાંચના નાણાં ત્યાં જ હાજર ત્રીજા આરોપી વિષ્ણુભાઇ કાશીરામ પટેલને આપી દેવા માટે જણાવવામાં આવ્યું હતું.

 એસીબીનું છટકું અને કાર્યવાહી:

ફરિયાદી લાંચ આપવા માંગતા ન હોવાથી તેમણે ટોલ ફ્રી નંબર ૧૦૬૪ પર એસીબીનો સંપર્ક કર્યો હતો. જે અન્વયે તા. ૧૭/૦૪/૨૦૨૬ના રોજ અમરાઈવાડી પોલીસ સ્ટેશન સામે આવેલા ચંદ્ર સ્ટુડિયો પાસે લાંચના છટકાનું આયોજન કરવામાં આવ્યું હતું. ટ્રેપ દરમિયાન હેડ કોન્સ્ટેબલ કિશનકુમારના કહેવાથી હોમગાર્ડ કેતન જોશીએ ફરિયાદી સાથે હેતુલક્ષી વાતચીત કરી હતી. ત્યારબાદ આરોપી વિષ્ણુભાઇ પટેલે લાંચના ૩,૦૦૦ રૂપિયા સ્વીકારતા જ એસીબીની ટીમે તેમને રંગેહાથ ઝડપી લીધા હતા.

 તપાસ અને વોન્ટેડ આરોપીઓ:

ટ્રેપિંગ ઓફિસર પો.ઇન્સ. વી.ડી. ચૌધરીની ટીમ દ્વારા સ્થળ પરથી લાંચની રકમ રિકવર કરવામાં આવી છે. જોકે, મુખ્ય આરોપી હેડ કોન્સ્ટેબલ કિશનકુમાર અગ્રાવત અને હોમગાર્ડ કેતન જોશી સ્થળ પર હાજર મળી આવ્યા ન હોવાથી તેમને વોન્ટેડ જાહેર કરવામાં આવ્યા છે. આ સમગ્ર કામગીરી મદદનીશ નિયામક એમ.એચ. પુંવાર અને નાયબ નિયામક હરેશ મેવાડાના સુપરવિઝન હેઠળ કરવામાં આવી છે. એસીબીએ ત્રણેય આરોપીઓ વિરુદ્ધ એકબીજાના મેળાપીપણામાં ભ્રષ્ટાચાર નિવારણ અધિનિયમ હેઠળ ગુનો નોંધી આગળની તપાસ તેજ કરી છે.