અમદાવાદ : અમદાવાદના સરદાર વલ્લભભાઈ પટેલ ઈન્ટરનેશનલ એરપોર્ટ પર ડિરેક્ટોરેટ ઓફ રેવન્યુ ઈન્ટેલિજન્સ (DRI) એ મોટી કાર્યવાહી કરીને કરોડોનું ડ્રગ્સ ઝડપી પાડ્યું છે. બેંગકોકથી અમદાવાદ આવેલી એર ઈન્ડિયાની ફ્લાઈટ AI-346 માંથી 8.5 કરોડની કિંમતનો હાઈબ્રિડ ગાંજો જપ્ત કરવામાં આવ્યો છે.

DRI ને મળેલી ખાનગી બાતમીના આધારે શુક્રવારે મોડી રાત્રે આ કાર્યવાહી કરવામાં આવી હતી. બેંગકોકથી આવેલી ફ્લાઈટના બે થાઈલેન્ડની મહિલા મુસાફરો પર શંકા જતા તેમના સામાનની તલાશી લેવામાં આવી હતી. તલાશી દરમિયાન તેમની ટ્રોલી બેગના ગુપ્ત ખાનામાંથી 8 કિલો 500 ગ્રામ હાઈ ક્વોલિટી હાઈબ્રિડ ગાંજાના પેકેટ્સ મળી આવ્યા હતા.

જપ્ત કરાયેલા ગાંજાની આંતરરાષ્ટ્રીય બજારમાં કિંમત અંદાજે 8.5 કરોડ રૂપિયા આંકવામાં આવી છે. DRI એ બંને મહિલા આરોપી ચાનિડા અને નાપાસોર્નની ધરપકડ કરી NDPS એક્ટ હેઠળ ગુનો નોંધ્યો છે. 

પ્રાથમિક પૂછપરછમાં જાણવા મળ્યું છે કે આ ડ્રગ્સ અમદાવાદ અને મુંબઈમાં સપ્લાય થવાનું હતું. આ આખું નેટવર્ક થાઈલેન્ડથી સંચાલિત થાય છે અને ભારતમાં કોને ડિલિવરી આપવાની હતી તે દિશામાં તપાસ શરૂ કરાઈ છે. 

DRI ના અધિકારીઓના જણાવ્યા મુજબ છેલ્લા 6 મહિનામાં અમદાવાદ એરપોર્ટ પરથી આ ચોથો મોટો ડ્રગ્સનો જથ્થો ઝડપાયો છે. બેંગકોક રૂટ પર ડ્રગ્સની હેરાફેરી વધતા સુરક્ષા એજન્સીઓ એલર્ટ થઈ ગઈ છે.