અમદાવાદ : અમદાવાદ ઈન્ટરનેશનલ એરપોર્ટ પર તાજેતરમાં પકડાયેલા કરોડો રૂપિયાના હાઇડ્રોપોનિક ગાંજાના કેસે તપાસ એજન્સીઓના કાન સરવા કરી દીધા છે. એક અઠવાડિયાના ટૂંકા ગાળામાં ડ્રગ્સના બે મોટા કન્સાઇન્મેન્ટ ઝડપાતા અને બંનેની કામ કરવાની પદ્ધતિમાં આશ્ચર્યજનક સમાનતા જોવા મળતા, કસ્ટમ વિભાગે હવે આ કેસમાં ફોરેન્સિક તપાસનું શસ્ત્ર ઉગામ્યું છે. આ તપાસનો મુખ્ય ઉદ્દેશ્ય ડ્રગ્સની હેરાફેરી પાછળ કામ કરતા આંતરરાષ્ટ્રીય સિન્ડિકેટને બેનકાબ કરવાનો છે.
રૂ. 15 કરોડથી વધુનું ડ્રગ્સ અને એકસરખી મોડસ ઓપરેન્ડી
કસ્ટમ વિભાગના સૂત્રોના જણાવ્યા મુજબ, પકડાયેલા બંને મુસાફરો બેંગકોકથી અમદાવાદ આવ્યા હતા. પ્રથમ કિસ્સામાં 11 કિલો અને બીજા કિસ્સામાં 4.2 કિલો હાઇડ્રોપોનિક ગાંજો ઝડપાયો હતો. આ બંને કન્સાઇન્મેન્ટની કુલ કિંમત રૂ. 15 કરોડથી વધુ આંકવામાં આવી રહી છે. સૌથી ચોંકાવનારી વાત એ છે કે, બંને આરોપીઓ એક જ એરલાઇન અને ફ્લાઇટ નંબરનો ઉપયોગ કરતા હતા, એટલું જ નહીં, પણ ગાંજો છુપાવવાની તેમની તરકીબ (મોડસ ઓપરેન્ડી) પણ એકદમ સમાન હતી. આ સમાનતા સ્પષ્ટ સંકેત આપે છે કે આ એક સુનિયોજિત અને વ્યવસ્થિત ડ્રગ્સ ગેંગનું કામ છે.
રીસીવર સુધી પહોંચવા ફોરેન્સિક એનાલિસિસની જરૂરિયાત
અધિકારીઓએ જણાવ્યું હતું કે, મોટાભાગના કિસ્સાઓમાં કસ્ટમ વિભાગ ડ્રગ્સ લઈને આવતા વાહક (કેરિયર) ને પકડી લે છે, પરંતુ અમદાવાદમાં ડ્રગ્સ લેવા આવતા મુખ્ય 'રીસીવર' સુધી પહોંચવું પડકારરૂપ હોય છે. હવે ફોરેન્સિક સાયન્સ ડિરેક્ટોરેટની મદદથી આરોપીઓના મોબાઈલ ફોન, ડિજિટલ ફૂટપ્રિન્ટ્સ, કોમ્યુનિકેશન રેકોર્ડ અને ટ્રાવેલ હિસ્ટ્રીનું ઝીણવટભર્યું વિશ્લેષણ કરવામાં આવશે. આ ડેટા દ્વારા મુસાફરી દરમિયાન તેઓ કોના કોના સંપર્કમાં હતા, તે દરેક વ્યક્તિની ઓળખ કરવામાં આવશે.
આંતરરાષ્ટ્રીય બજારમાં મોટી માંગ
હાઇડ્રોપોનિક ગાંજાની આંતરરાષ્ટ્રીય બજારમાં કિંમત પ્રતિ કિલો લગભગ રૂ. 1 કરોડ જેટલી હોવાનું માનવામાં આવે છે. આટલી મોંઘી અને હાઈ-પ્રોફાઈલ ડ્રગ્સની હેરાફેરીમાં અમદાવાદ એક મુખ્ય ટ્રાન્ઝિટ પોઈન્ટ બની રહ્યું હોવાની શક્યતા તપાસ એજન્સીઓ તપાસી રહી છે. હાલ સમગ્ર તપાસનું ધ્યાન એ વાત પર કેન્દ્રિત છે કે આ બંને આરોપીઓ એક જ ગેંગના સભ્યો છે કે કેમ. આ ફોરેન્સિક તપાસના પરિણામો ડ્રગ્સ માફિયાઓ સુધી પહોંચવામાં પોલીસ અને કસ્ટમ માટે ગેમ-ચેન્જર સાબિત થઈ શકે છે.