અમદાવાદ : દિવાળી અને છઠ પૂજાના તહેવારો દરમિયાન વતન જતા મુસાફરોની અવિરત ભીડને ધ્યાનમાં રાખીને અમદાવાદ મંડળ દ્વારા કાલુપુર અને સાબરમતી રેલવે સ્ટેશનો પર સુરક્ષા અને ભીડ નિયંત્રણ માટે ખાસ ૨૪ કલાક કાર્યરત 'વોર રૂમ' શરૂ કરવામાં આવ્યો છે.

તહેવારોના આ માહોલ વચ્ચે સ્ટેશનો પર સર્જાતી અફરાતફરી અને ભારે ભીડની સ્થિતિને યોગ્ય રીતે સંચાલિત કરવા માટે ડિવિઝનલ રેલવે મેનેજર (DRM) કાર્યાલયના કંટ્રોલ બિલ્ડિંગમાં આ વિશેષ વોર રૂમ તૈયાર કરવામાં આવ્યો છે, જ્યાંથી સતત રિયલ-ટાઇમ દેખરેખ રાખવામાં આવી રહી છે.

આ વોર રૂમમાંથી અત્યાધુનિક સીસીટીવી કેમેરાના માધ્યમથી પ્લેટફોર્મ પરની ભીડ, મુસાફરોની અવરજવર અને હોલ્ડિંગ એરિયાની સ્થિતિ પર સતત નજર રાખવામાં આવી રહી છે, જેથી કોઈપણ અસુવિધા કે વધુ પડતી ભીડ જણાતા જ ત્વરિત પગલાં લઈ શકાય.

અમદાવાદ મંડળના ઉચ્ચ અધિકારીઓએ આ વોર રૂમની મુલાકાત લઈને સુરક્ષા વ્યવસ્થાની સમીક્ષા કરી હતી અને અધિકારીઓને કડક સૂચના આપી હતી કે ટ્રેન આવે ત્યારે લાઈનબદ્ધ રીતે બોર્ડિંગ કરાવવું તેમજ સ્ટેશનો પર પૂરતું સંકલન જાળવવું.

કોઈપણ સ્ટેશન પર મુસાફરોની સંખ્યા અચાનક વધવાની સ્થિતિમાં વોર રૂમ દ્વારા તુરંત જ આરપીએફ (RPF) ના જવાનો અને સંબંધિત રેલવે કર્મચારીઓને સક્રિય કરીને જરૂરી વ્યવસ્થાઓ ગોઠવવામાં આવી રહી છે.

મુસાફરોને વિશેષ ટ્રેનો અને સમયપત્રકની સાચી માહિતી મળી રહે તે માટે ઇલેક્ટ્રોનિક ડિસ્પ્લે બોર્ડ અને જાહેર ઘોષણા પ્રણાલીનો વ્યાપક ઉપયોગ કરવામાં આવી રહ્યો છે, જેથી તહેવારોની આ મોસમમાં મુસાફરોની મુસાફરી સુરક્ષિત અને સુગમ બની રહે.