અમદાવાદ :ગુજરાતમાં ચોમાસાના ઉગ્ર સ્વરૂપ અને કુદરતી પ્રકોપને ધ્યાનમાં રાખીને વહીવટી તંત્ર દ્વારા વિદ્યાર્થીઓની સુરક્ષા માટે મોટો નિર્ણય લેવાયો છે સત્તાવાર અહેવાલ મુજબ, હવામાન વિભાગની અતિભારે વરસાદની આગાહીને પગલે 1 ઓગસ્ટના રોજ અમદાવાદ, સુરત, ભાવનગર સહિતના અનેક જિલ્લાઓમાં તમામ શાળાઓ અને કોલેજો બંધ રહેશે.

ગુજરાત રાજ્યમાં મેઘરાજાની બેટિંગ હવે પૂરની સ્થિતિ તરફ આગળ વધી રહી છે ત્યારે શિક્ષણ વિભાગ અને સ્થાનિક પ્રશાસન એકશન મોડમાં આવ્યું છે. તાજા આદેશો અનુસાર, ભારતીય હવામાન વિભાગ (IMD) દ્વારા આગામી 24 કલાક માટે રાજ્યના અનેક વિસ્તારોમાં રેડ અને ઓરેન્જ એલર્ટ જાહેર કરવામાં આવ્યું છે.

આ પરિસ્થિતિને ગંભીરતાથી લઈને અલગ-અલગ જિલ્લાના કલેક્ટરો દ્વારા નાના બાળકો અને વિદ્યાર્થીઓના હિતમાં શૈક્ષણિક સંસ્થાઓમાં સત્તાવાર રજા જાહેર કરવામાં આવી છે. રાજ્યના મુખ્ય નગરોથી લઈને ગ્રામીણ વિસ્તારો સુધી આ કાનૂની આદેશનો ચુસ્ત અમલ કરવા માટે સૂચના આપવામાં આવી છે.

મેગા સિટી અમદાવાદ અને ઔદ્યોગિક હબ સુરતમાં પરિસ્થિતિને જોતા વિશિષ્ટ પરિપત્રો જાહેર કરાયા છે. અમદાવાદ શહેરની તમામ સરકારી અને ખાનગી શાળાઓમાં આવતીકાલે શૈક્ષણિક કાર્ય સંપૂર્ણ બંધ રહેશે. સુરત જિલ્લા શિક્ષણાધિકારીએ પણ એક મહત્વપૂર્ણ પરિપત્ર જારી કરીને શહેર તેમજ ગ્રામ્ય વિસ્તારની તમામ શાળાઓ, કોલેજો, ખાનગી ટ્યુશન ક્લાસીસ, આઇટીઆઇ (ITI) અને આંગણવાડીઓમાં રજા જાહેર કરી દીધી છે.

ભાવનગર જિલ્લાની વાત કરીએ તો, ત્યાંના કલેક્ટર મનીષ કુમાર બંસલ દ્વારા સ્પષ્ટ માહિતી આપવામાં આવી છે કે વરસાદની તીવ્રતાને જોતા 1 ઓગસ્ટના રોજ ભાવનગર જિલ્લાની તમામ શાળાઓ અને શિક્ષણ કેન્દ્રો બંધ રહેશે. આ આદેશનું ઉલ્લંઘન કરનાર સંસ્થાઓ સામે કાયદેસરની કાર્યવાહી પણ થઈ શકે છે.

દક્ષિણ અને મધ્ય ગુજરાતના આદિવાસી વિસ્તારોમાં પણ મેઘરાજાએ તોફાની ઇનિંગ શરૂ કરી છે.  છોટાઉદેપુર જિલ્લામાં અતિભારે વરસાદના 'રેડ એલર્ટ' વચ્ચે કલેક્ટર ગાર્ગી જૈને 1 ઓગસ્ટના રોજ તમામ શાળાઓ અને આંગણવાડીઓમાં રજાની જાહેરાત કરી છે.