અંબાજી: યાત્રાધામ અંબાજી નજીક આવેલા ખતરનાક વળાંકો માટે કુખ્યાત ત્રિશુલિયા ઘાટ પર ગઈકાલે મોડી રાત્રે સિમેન્ટના ભારે પિલર ભરેલી એક ટ્રક સ્ટેરીંગ પરથી કાબૂ ગુમાવીને પલટી મારી જતાં ડ્રાઇવર અને રસ્તા પર પસાર થઈ રહેલા એક ગૌવંશનું ઘટનાસ્થળે જ કરુણ મોત નીપજ્યું હતું.

પ્રાપ્ત વિગતો અનુસાર, અંબાજીથી દાંતા તરફ જઈ રહેલી આ ટ્રક મોડી રાત્રિના સુમારે ત્રિશુલિયા ઘાટ પર આવેલા હનુમાનજી મંદિર પાસે પહોંચી ત્યારે ચાલકે અચાનક વાહન પરનો કાબૂ ગુમાવી દીધો હતો. અકસ્માત એટલો ભયાનક હતો કે ટ્રકની કેબિનનો સંપૂર્ણ ભુક્કો બોલી ગયો હતો અને ભારે વજનના પિલર નીચે દબાઈ જવાથી ડ્રાઇવરનું સ્થળ પર જ પ્રાણપંખેરું ઊડી ગયું હતું.

ઘટનાની જાણ થતાં જ આસપાસના સ્થાનિક લોકો અને રાહદારીઓ તાત્કાલિક મદદ માટે દોડી આવ્યા હતા અને પોલીસને જાણ કરી હતી, જેના પગલે દાંતા તથા અંબાજી પોલીસ સ્ટેશનનો કાફલો ઘટનાસ્થળે પહોંચી ગયો હતો. પોલીસે ક્રેનની મદદથી પલટી ગયેલી ટ્રકને માર્ગ પરથી હટાવીને ટ્રાફિક પૂર્વવત કર્યો હતો અને મૃતક ડ્રાઇવરના શબને પોસ્ટમોર્ટમ અર્થે સરકારી હોસ્પિટલમાં મોકલી આપીને વધુ તપાસ શરૂ કરી છે.

અંબાજી-દાંતા માર્ગ પર અગાઉ પણ અનેક ગંભીર અકસ્માતો સર્જાયા હોવાના કારણે વાહનચાલકોની સુરક્ષા માટે તંત્ર દ્વારા સ્પીડ બ્રેકર અને રેલિંગ જેવી સુવિધાઓ વધારવાની માંગ સ્થાનિકો દ્વારા જોરશોરથી ઉઠાવવામાં આવી રહી છે.