અમદાવાદ : ગુજરાતમાંથી ચોમાસાની સત્તાવાર વિદાય થઈ ચૂકી છે અને શક્તિની આરાધનાના પર્વ સમાન નવરાત્રીનો પ્રારંભ થઈ રહ્યો છે. શિયાળાની ગુલાબી ઠંડીની શરૂઆત પહેલા રાજ્યમાં ફરી એકવાર ગરમીનું જોર વધી રહ્યું છે, ત્યારે જાણીતા હવામાન નિષ્ણાંત અંબાલાલ પટેલે આગામી દિવસોની સ્થિતિને લઈને એક મહત્વપૂર્ણ આગાહી કરી છે.

અંબાલાલ પટેલના જણાવ્યા અનુસાર, નવરાત્રીના પવિત્ર દિવસો દરમિયાન ગુજરાતમાં અકળાવનારી ગરમીનો પ્રકોપ વિશેષ જોવા મળશે. ખાસ કરીને નવરાત્રીની શરૂઆતમાં મધ્ય ગુજરાતના ભાગોમાં મહત્તમ તાપમાન ૩૭ થી ૪૦ ડિગ્રી સેલ્સિયસની રેન્જમાં રહેવાની સંભાવના છે, જ્યારે અમુક વિસ્તારોમાં આ તાપમાન ૪૦ ડિગ્રીથી પણ ઉપર જઈ શકે છે. આ ઉપરાંત ઉત્તર ગુજરાતના પ્રદેશોમાં પણ ગરમીનું પ્રમાણ ઊંચું જળવાઈ રહેશે.

બીજી તરફ, વરસાદી માહોલ અંગે વાત કરતા હવામાન નિષ્ણાંતે જણાવ્યું કે અરબ સાગર તરફથી આવતા ભેજવાળા પવનો અને ઓક્ટોબર મહિનાના અંતમાં સક્રિય થનારા એક મજબૂત વેસ્ટર્ન ડિસ્ટર્બન્સ (પશ્ચિમી વિક્ષેપ) ના કારણે ૨૧ ઓક્ટોબર પછી હવામાનમાં પલટો આવી શકે છે. ખાસ કરીને ૨૮ ઓક્ટોબરથી ૫ નવેમ્બર વચ્ચે રાજ્યમાં વાદળછાયું વાતાવરણ જોવા મળી શકે છે અને મધ્ય તથા ઉત્તર ગુજરાતના કેટલાક ભાગોમાં છૂટાછવાયા હળવા ઝાપટાં પડવાની પણ સંભાવના છે.

હવામાનની આ આગાહીને કારણે ગરબે ઘૂમવા માટે થનગની રહેલા લાખો ખેલૈયાઓ અને ગરબા આયોજકોને રાહત મળી છે, કારણ કે નવરાત્રીના મુખ્ય દિવસોમાં વરસાદની કોઈ ખાસ શક્યતા નથી. જો કે, તહેવારો પૂરા થયા બાદ અને દિવાળીના આગમન ટાણે ગુજરાતના વાતાવરણમાં શિયાળાની આગમન પૂર્વે ફેરફાર જોવા મળી શકે છે.