અમદાવાદ : રાજયના હિલ સ્ટેશન સાપુતારા પ્રવાસીઓ માટે મનપસંદ સ્થળ છે, પરંતુ અહીંના ઘાટ માર્ગો પર અવારનવાર અકસ્માતની ઘટનાઓ સામે આવતી હોય છે. આજે સાપુતારાના માલેંગાવ નાકા પાસે એક બેકાબૂ બનેલી ટ્રકે ટ્રેક્ટર અને કારને જોરદાર ટક્કર મારતા ગમખ્વાર અકસ્માત સર્જાયો હતો. સદનસીબે, કારમાં સવાર સુરતના પ્રવાસીઓનો આબાદ બચાવ થયો છે, જેના કારણે એક મોટી હોનારત ટળી છે.

ડાંગ જિલ્લાના સાપુતારા સ્થિત માલેંગાવ નાકા અને ટોલનાકા પાસે આ અકસ્માતની ઘટના બની હતી. મળતી માહિતી મુજબ, એક પૂરપાટ ઝડપે આવી રહેલી ટ્રકના ચાલકે સ્ટીયરિંગ પરથી કાબૂ ગુમાવ્યો હતો. બેકાબૂ બનેલી આ ટ્રકે માર્ગ પર પસાર થઈ રહેલા એક ટ્રેક્ટર અને પ્રવાસીઓની કારને પોતાની અડફેટમાં લીધા હતા. ટક્કર એટલી જોરદાર હતી કે વાહનોને નોંધપાત્ર નુકસાન થયું હતું.

આ અકસ્માતનો ભોગ બનેલી કારમાં સુરતથી સાપુતારા ફરવા નીકળેલા પ્રવાસીઓ સવાર હતા. કારમાં બે મહિલાઓ અને બે બાળકો સહિત કુલ 7 લોકો સવાર હતા. અકસ્માતને પગલે ઘટનાસ્થળે અફરાતફરી મચી ગઈ હતી, પરંતુ રાહતની વાત એ છે કે કારમાં સવાર તમામ સાતેય લોકોનો ચમત્કારિક રીતે આબાદ બચાવ થયો છે. તમામને સામાન્ય ઈજાઓ પહોંચી હોવાનું જાણવા મળ્યું છે.

અકસ્માતની જાણ થતા જ આસપાસના લોકો અને પોલીસ કાફલો ઘટનાસ્થળે દોડી આવ્યો હતો. ઘાયલોને તાત્કાલિક પ્રાથમિક સારવાર માટે ખસેડવામાં આવ્યા હતા. અકસ્માતને કારણે સાપુતારાના મુખ્ય માર્ગ પર ટ્રાફિક જામની સ્થિતિ સર્જાઈ હતી, જેને પોલીસે હળવો કરાવ્યો હતો. હાલ પોલીસે બેકાબૂ ટ્રકચાલક વિરુદ્ધ ગુનો નોંધી આગળની કાયદેસરની કાર્યવાહી હાથ ધરી છે.