​અંબાજી : ગુજરાતભરમાં છેલ્લા કેટલાક સમયથી ગરમીનો પારો આસમાને પહોંચ્યો છે, ત્યારે બનાસકાંઠા જિલ્લાના સુપ્રસિદ્ધ યાત્રાધામ અને પવિત્ર શક્તિપીઠ અંબાજી તેમજ તેની આસપાસના ગ્રામ્ય વિસ્તારોમાં આજે વાતાવરણમાં અચાનક મોટો પલટો જોવા મળ્યો હતો. છેલ્લા ઘણા દિવસોથી અસહ્ય ગરમી, તીવ્ર બફારા અને કાળઝાળ ઉકળાટથી તોબા પોકારી ઉઠેલા સ્થાનિક રહીશો અને મા અંબેના દર્શનાર્થે આવેલા લાખો શ્રદ્ધાળુઓ માટે આજના બદલાયેલા હવામાને મોટી રાહત આપી છે.

​બપોરના સમયે અચાનક આખું આકાશ કાળાડિબાંગ વાદળોની ચાદરથી ઘેરાઈ ગયું હતું, જેને પગલે પંથકમાં અંધારપટ જેવો માહોલ સર્જાયો હતો. ઘેરાયેલા વાદળોની સાથે જ અંબાજી પંથકમાં મેઘરાજાએ વિધિવત રીતે ધીમીધારે પધરામણી કરી હતી. ધીમીધારે શરૂ થયેલા આ વરસાદના કારણે સમગ્ર પંથકનું તાપમાન ગગડ્યું છે અને વાતાવરણમાં એકાએક ભારે ઠંડક પ્રસરી ગઈ છે.

​આ અણધાર્યા વરસાદી આગમનને પગલે ગરમીથી ત્રસ્ત બનેલા લોકોમાં ભારે આનંદ અને ઉત્સાહનો માહોલ જોવા મળી રહ્યો છે. અંબાજી મંદિર પરિસરમાં હાજર યાત્રાળુઓ પણ વાતાવરણ આહલાદક બનતા ખુશખુશાલ નજરે પડ્યા હતા. ચારેય તરફ શીતલ લહેર વ્યાપી જતાં કાળઝાળ ગરમીમાંથી લોકોને પલભરમાં મુક્તિ મળી છે અને સમગ્ર અંબાજી પંથક વરસાદી માહોલના રંગે રંગાયું છે.