સુરત : અમદાવાદ-મુંબઈ બુલેટ ટ્રેન પ્રોજેક્ટના મહત્વપૂર્ણ વિકાસ અંતર્ગત નેશનલ હાઈ સ્પીડ રેલ કોર્પોરેશન લિમિટેડ દ્વારા સુરત-બીલીમોરા એલિવેટેડ સેક્શન પર આગામી ૨૦ નવેમ્બર, ૨૦૨૬ કે ત્યારબાદ ગમે ત્યારે ઓવરહેડ ઇલેક્ટ્રિકલ વાયરોમાં હાઈ-વોલ્ટેજ વીજપ્રવાહ શરૂ કરવાનો નિર્ણય લેવામાં આવ્યો છે.

પ્રાપ્ત વિગતો અનુસાર, પ્રોજેક્ટની કામગીરીને વેગ આપવા માટે હાથ ધરાયેલા આ પગલાને ધ્યાનમાં રાખીને તંત્ર દ્વારા આસપાસના વિસ્તારના નાગરિકો અને સામાન્ય જનતાને ઓવરહેડ વાયરોને હંમેશાં જીવંત ગણીને સાવચેત રહેવા અને તેની નજીક ન જવાની સખત સૂચના આપવામાં આવી છે.

સુરક્ષાના બાબતોને સર્વોચ્ચ પ્રાથમિકતા આપીને કોર્પોરેશને સ્પષ્ટ કર્યું છે કે બિનઅધિકૃત વ્યક્તિઓ દ્વારા ઇલેક્ટ્રિકલ ઇન્સ્ટોલેશન્સની આસપાસ કોઈપણ પ્રકારનું કામ કરવામાં ન આવે જેથી કોઈપણ પ્રકારના ગંભીર અકસ્માતો કે અનિચ્છનીય બનાવ ટાળી શકાય.

આ સમગ્ર ૫૦૮ કિલોમીટર લાંબા બુલેટ ટ્રેન કોરિડોરને અવિરત અને સુરક્ષિત વીજ પુરવઠો પૂરો પાડવા માટે કુલ ૧૪ ટ્રેક્શન સબસ્ટેશન સ્થાપિત કરવામાં આવી રહ્યા છે, જેમાંથી પાંચ મહારાષ્ટ્ર અને નવ ગુજરાત રાજ્યમાં કાર્યરત થશે.

રેલવે મંત્રાલયના અગાઉના આયોજન મુજબ દેશની પ્રથમ બુલેટ ટ્રેન આગામી વર્ષે દોડાવવાનું લક્ષ્ય રાખવામાં આવ્યું છે, જેમાં મે-જૂન ૨૦૨૭ દરમિયાન હાઈ સ્પીડ ટ્રેક પર ટ્રાયલ રન અને ઓગસ્ટ ૨૦૨૭ સુધીમાં કમર્શિયલ સેવા શરૂ કરવા માટેનું આયોજન છે.

આગામી સમયમાં મુંબઈ-અમદાવાદ કોરિડોર પર શરૂ થનારી આ હાઈ-સ્પીડ રેલ સેવા દેશના પરિવહન ક્ષેત્રે એક નવો અને આધુનિક અધ્યાય જોડશે, જેને લઈને રેલવે તંત્ર દ્વારા તમામ તબક્કાવાર તૈયારીઓ યુદ્ધના ધોરણે પૂર્ણ કરવામાં આવી રહી છે.