ગાંધીનગર જિલ્લામાં છેલ્લા કેટલાક સમયથી ઘરફોડ ચોરીની વધતી જતી ઘટનાઓને પગલે પોલીસ તંત્ર હરકતમાં આવ્યું હતું. ગાંધીનગર LCBની ટીમને મોટી સફળતા મળી છે, જેમાં કુખ્યાત ચીખલીગર ગેંગના સભ્યોને ઝડપી પાડવામાં આવ્યા છે. આ ગેંગ મુખ્યત્વે બંધ મકાનોને નિશાન બનાવી સોના-ચાંદીના દાગીના અને રોકડ રકમની ચોરી કરતી હતી.

તપાસમાં સામે આવ્યું છે કે, આ ગેંગના સભ્યો અત્યંત આયોજનબદ્ધ રીતે કામ કરતા હતા. તેઓ ચોરી કરતા પહેલા લક્ઝરી ગાડીઓ અને દ્વિચક્રી વાહનોનો ઉપયોગ કરીને સોસાયટીઓમાં રેકી કરતા હતા. ચોરી કરવામાં કોઈ પુરાવા ન મળે તે માટે તેઓ જાણીજોઈને નંબર વગરના વાહનોનો ઉપયોગ કરતા હતા, જેથી પોલીસની નજરથી બચી શકાય. ચીલોડા પાસેથી નાકાબંધી દરમિયાન પોલીસે શંકાસ્પદ વાહનો અટકાવતા જ આ ગેંગનો ભાંડો ફૂટ્યો હતો.

પોલીસ પૂછપરછમાં સામે આવ્યું છે કે, આ ગેંગે ગાંધીનગર સહિત આસપાસના વિસ્તારોમાં કુલ 23 જેટલી ઘરફોડ ચોરીઓ આચરી હોવાની કબૂલાત કરી છે. ગેંગના મુખ્ય સૂત્રધાર સામે અગાઉ હત્યા જેવા ગંભીર ગુનાઓ પણ નોંધાયેલા છે, જે આ ગેંગની ક્રૂરતા અને અપરાધિક ઈતિહાસની સાબિતી આપે છે. હાલમાં પોલીસે ચોરીમાં વપરાયેલી કાર અને અન્ય મુદ્દામાલ કબજે કર્યો છે.

પોલીસ સૂત્રોના જણાવ્યા અનુસાર, હજુ પણ આ ગેંગના 4 સભ્યો ફરાર છે, જેમની શોધખોળ માટે પોલીસની અલગ-અલગ ટીમો કાર્યરત કરવામાં આવી છે. આ ગેંગની ધરપકડથી ગાંધીનગરમાં મિલકત વિરુદ્ધના ગુનાઓમાં મોટો ઘટાડો આવવાની આશા છે.