મહેસાણા તા.૧૫: મહેસાણા જિલ્લામાં ભાજપની લહેર યથાવત છે. સ્થાનિક સ્વરાજ્યની ચૂંટણીમાં ઊંઝા, કડી અને વિજાપુરમાં વિપક્ષના સૂપડા સાફ થઈ ગયા છે. અનેક બેઠકો પર કોંગ્રેસ અને અપક્ષ ઉમેદવારોએ ફોર્મ પાછા ખેંચી લેતાં ભાજપના ઉમેદવારો બિનહરીફ વિજેતા જાહેર થયા છે. જિલ્લામાં ભાજપના ભગવો લહેરાતા કાર્યકરોમાં ભારે ઉત્સાહ જોવા મળી રહ્યો છે.

મળતી માહિતી મુજબ મહેસાણા જિલ્લાની નગરપાલિકાઓ અને તાલુકા પંચાયતોની ચૂંટણી માટે ફોર્મ ખેંચવાના અંતિમ દિવસે મોટો ઉલટફેર થયો હતો. ઊંઝા નગરપાલિકા, કડી અને વિજાપુરની અનેક બેઠકો પર વિપક્ષના ઉમેદવારોએ ઉમેદવારી પાછી ખેંચી લીધી હતી. જેના પગલે આ બેઠકો પર ભાજપના ઉમેદવારો બિનહરીફ ચૂંટાઈ આવ્યા છે.

મહેસાણા જિલ્લો ભાજપનો ગઢ ગણાય છે. વડાપ્રધાન નરેન્દ્ર મોદી, કેન્દ્રીય ગૃહમંત્રી અમિત શાહ અને પૂર્વ નાયબ મુખ્યમંત્રી નીતિન પટેલનો આ ગૃહ જિલ્લો છે. 2022ની વિધાનસભા ચૂંટણીમાં પણ ભાજપે જિલ્લાની સાતેય બેઠકો ઊંઝા, વિસનગર, બેચરાજી, કડી, મહેસાણા, ખેરાલુ અને વિજાપુર પર ક્લીન સ્વીપ કર્યો હતો. ઊંઝામાં કે. કે. પટેલ, કડીમાં કરસનભાઈ સોલંકી અને વિજાપુરમાં રમણભાઈ પટેલનો વિજય થયો હતો.

ભાજપનો આ દબદબો સ્થાનિક સ્વરાજ્યમાં પણ યથાવત રહ્યો છે. અગાઉ મહેસાણા APMCની 12 બેઠકો પર પણ ભાજપની પેનલ બિનહરીફ ચૂંટાઈ હતી. કોંગ્રેસના તમામ 12 ઉમેદવારોએ ફોર્મ પાછા ખેંચી લેતાં 38 વર્ષ બાદ કોંગ્રેસનો ગઢ ભાજપે કબજે કર્યો હતો. નાયબ મુખ્યમંત્રી નીતિન પટેલે આ જીતમાં મહત્વની ભૂમિકા ભજવી હતી.

જોકે 2015ની સ્થાનિક સ્વરાજ્યની ચૂંટણીમાં પાટીદાર અનામત આંદોલનની અસરને કારણે ઊંઝા નગરપાલિકામાં ભાજપને ઉમેદવારો શોધવા મુશ્કેલ પડ્યા હતા. 36 બેઠકો માટે ભાજપે એકપણ ઉમેદવાર ઉભો રાખ્યો ન હતો અને 155માંથી 149 અપક્ષ ઉમેદવારોએ ફોર્મ ભર્યા હતા. પરંતુ હવે સ્થિતિ બદલાઈ છે અને ભાજપ ફરી મજબૂત સ્થિતિમાં છે.

તાજેતરની કડી વિધાનસભાની પેટાચૂંટણીમાં પણ ભાજપના રાજેન્દ્ર ચાવડાએ 39,452 મતની જંગી સરસાઈથી જીત મેળવી હતી. કોંગ્રેસના રમેશ ચાવડાને હરાવી ભાજપે આ અનામત બેઠક જાળવી રાખી હતી. જિલ્લામાં ભાજપનું સંગઠન મજબૂત હોવાથી અને નેતૃત્વના પ્રભાવને કારણે વિપક્ષ હાંસિયામાં ધકેલાઈ ગયો છે.