આણંદ: ગુજરાતમાં આગામી સ્થાનિક સ્વરાજ્યની ચૂંટણીઓએ અત્યારથી જ ભારે ઉત્તેજના જગાવી છે. મતદાન પહેલા જ રાજકીય ગણિતોમાં મોટા ઉલટફેર જોવા મળી રહ્યા છે. રાજ્યભરમાં ઉમેદવારી ફોર્મની ચકાસણી દરમિયાન ટેકનિકલ ખામીઓ અને દસ્તાવેજોના અભાવે ૧૦,૦૦૦ થી વધુ નામાંકન રદ થતા ચૂંટણીનું ચિત્ર સંપૂર્ણપણે બદલાઈ ગયું છે. આ પરિસ્થિતિમાં અનેક બેઠકો પર હરીફાઈ જ ન રહેતા ભારતીય જનતા પાર્ટીએ ચૂંટણી પૂર્વે જ જીતનો શંખનાદ કરી દીધો છે.
આણંદ જિલ્લામાં ભાજપની 'બિનહરીફ' મહારત
કોંગ્રેસના દિગ્ગજ નેતાઓ ભરત સોલંકી અને અમિત ચાવડાના ગઢ ગણાતા આણંદ જિલ્લામાં ભાજપે મોટો ઉલટફેર કર્યો છે. જિલ્લા પંચાયત, તાલુકા પંચાયત અને નગરપાલિકાની કુલ ૨૫ બેઠકો પર ભાજપના ઉમેદવારો કોઈ પણ હરીફાઈ વિના બિનહરીફ વિજેતા જાહેર થયા છે. ખાસ કરીને ચિખોદરા જિલ્લા પંચાયત બેઠક પર કોંગ્રેસના ઉમેદવારે છેલ્લી ઘડીએ ફોર્મ પાછું ખેંચી લેતા ભાજપનો વિજયી માર્ગ મોકળો બન્યો હતો.
ક્યાં ક્યાં લહેરાયો જીતનો ધ્વજ?
ભાજપે જે મહત્વની બેઠકો પર બિનહરીફ જીત મેળવી છે તેમાં સોજિત્રાની પીપલાવ બેઠક, તારાપુરની વરસાડા બેઠક અને પેટલાદ-ખંભાત નગરપાલિકાના વિવિધ વોર્ડનો સમાવેશ થાય છે. આ ઉપરાંત ચિખોદરા, પાલજ અને વાંસોલ જેવી પ્રતિષ્ઠિત જિલ્લા પંચાયત બેઠકો પર પણ ભાજપનો કેસરીયો લહેરાઈ ચૂક્યો છે. આ જીતે ભાજપના કાર્યકરોમાં ભારે ઉત્સાહ ભરી દીધો છે.
કોંગ્રેસ માટે ચિંતાજનક સ્થિતિ
બીજી તરફ, મુખ્ય વિરોધ પક્ષ કોંગ્રેસ માટે આ ચૂંટણી પડકારજનક સાબિત થઈ રહી છે. અનેક બેઠકો પર ઉમેદવારોના ફોર્મ રદ થવા અથવા છેલ્લી ઘડીએ નામાંકન પાછા ખેંચવાની ઘટનાઓએ પક્ષને નબળો પાડ્યો હોય તેમ જણાય છે. કોંગ્રેસના ગઢ ગણાતા વિસ્તારોમાં ભાજપની આ ઘૂસણખોરી આગામી સમયમાં મોટા રાજકીય પરિવર્તનના સંકેત આપી રહી છે.
૧૫ એપ્રિલ પર સૌની મીટ
ઉમેદવારી ફોર્મ પાછા ખેંચવાની અંતિમ તારીખ ૧૫ એપ્રિલ છે. રાજકીય વિશ્લેષકોનું માનવું છે કે હજુ પણ કેટલીક બેઠકો પર ખેંચતાણ થઈ શકે છે અને બિનહરીફ બેઠકોનો આંકડો વધી શકે છે. ૧૫ એપ્રિલ સાંજ સુધીમાં ગુજરાતની સ્થાનિક સ્વરાજ્યની ચૂંટણીનું આખરી અને સ્પષ્ટ ચિત્ર જનતા સમક્ષ આવી જશે.