વલસાડ જિલ્લાના ધરમપુર નજીક આવેલા આંબાતલાટ પાસે રખડતા પશુઓના કારણે એક અત્યંત કરૂણ અને જીવલેણ માર્ગ અકસ્માત સર્જાયો છે. પવિત્ર યાત્રાધામ ઉનાઈથી દર્શન કરીને ખુશી-ખુશી પરત ફરી રહેલા એક પરિવારની કાર આડે અચાનક રખડતું ઢોર આવી ગયું હતું. આ પશુને બચાવવાના ચક્કરમાં કાર ચાલકે વાહન પરથી કાબુ ગુમાવતા કાર ધડાકાભેર અથડાઈ પડી હતી. આ ગોઝારી દુર્ઘટનામાં પરિવારના એક સભ્યનું ઘટનાસ્થળે જ મોત નિપજ્યું છે, જ્યારે અન્ય 6 લોકોને નાની-મોટી ઇજાઓ પહોંચી છે.