અંબાજી : શારદીય નવરાત્રિના આઠમા નોરતે મહાઅષ્ટમીના પવિત્ર અવસરે મુખ્યમંત્રી ભૂપેન્દ્રભાઈ પટેલે સુપ્રસિદ્ધ યાત્રાધામ અંબાજીની મુલાકાત લઈને આદ્યશક્તિ મા અંબાનાં દર્શન અને પૂજા-અર્ચના કરી હતી.

મુખ્યમંત્રીશ્રીએ દેશનાં સુપ્રસિદ્ધ ૫૧ શક્તિપીઠોમાં મુખ્ય સ્થાન ધરાવતા અંબાજી મંદિરમાં જગતજનની મા જગદંબાનાં ચરણોમાં ભાવપૂર્વક શીશ ઝુકાવી ધન્યતા અનુભવી હતી. શાસ્ત્રોક્ત મંત્રોચ્ચાર વચ્ચે તેમણે વિશેષ પૂજા અને આરતી સંપન્ન કરી હતી.

આ પ્રસંગે મુખ્યમંત્રીશ્રીએ રાજ્યના સૌ નાગરિકોની સુખાકારી, નિરામય સ્વાસ્થ્ય અને સર્વાંગી પ્રગતિ માટે મા અંબાનાં ચરણોમાં પ્રાર્થના કરી હતી. ગુજરાત વિકાસ અને સમૃદ્ધિના નવા શિખરો સર કરે, રાજ્યમાં શાંતિ, સમરસતા અને સમૃદ્ધિ કાયમ રહે તેમજ ગુજરાતની વિકાસયાત્રાને આદ્યશક્તિના આશીર્વાદ સદાય મળતા રહે તેવી મંગલકામના તેમણે વ્યક્ત કરી હતી.

દર્શન અને પૂજન બાદ મુખ્યમંત્રીશ્રીએ નવરાત્રિ દરમિયાન દૂરદૂરથી અંબાજી ધામ આવતા માઈભક્તો માટે કરવામાં આવેલી સુવિધાઓ, સુરક્ષા અને દર્શન-વ્યવસ્થા અંગે જિલ્લા વહીવટી તંત્ર પાસેથી જાણકારી મેળવી હતી.

આ પ્રસંગે સ્થાનિક જનપ્રતિનિધિઓ, જિલ્લા કલેક્ટર, જિલ્લા વિકાસ અધિકારી, જિલ્લા પોલીસ વડા તેમજ દેવસ્થાન ટ્રસ્ટના ઉચ્ચ અધિકારીઓ ઉપસ્થિત રહ્યા હતા. મંદિર પરિસરમાં ઉપસ્થિત વિશાળ શ્રદ્ધાળુ સમુદાયે ‘જય અંબે’ના જયઘોષ સાથે મુખ્યમંત્રીશ્રીનું અભિવાદન કર્યું હતું.