ગાંધીનગરમાં વિદ્યુત નિરીક્ષક કચેરીમાં ફરજ બજાવતા ક્લાસ-1 અધિકારી AB ચૌધરી ભ્રષ્ટાચાર લાંચ કેસમાં ફસાઈ ગયા છે. તેમની કારમાંથી લાંચ લીધેલી 5 લાખની રકમ મળતાં ખળભળાટ મચ્યો છે. હાલ ACB એ આ લાંચિયા અધિકારી વિરુધ્ધ કડકમાં કડક કાર્યવાહી હાથ ધરી છે.

મળતી માહિતી મુજબ એક અરજદારે સોલાર પેનલ નાખવા માટે સરકારી મંજૂરી લેવાની પ્રક્રિયા હાથ ધરી હતી. આ કામગીરી પૂર્ણ કરવાના બદલામાં અધિકારી ચૌધરીએ લાંચની માંગણી કરી હતી, જેનાથી કંટાળીને અરજદારે લાંચ રુશ્વત વિરોધી બ્યુરો (ACB)નો સંપર્ક કર્યો હતો. અરજદારની ફરિયાદને પગલે ACBની ટીમે છટકુ ગોઠવ્યું હતુ. આ કાર્યવાહી દરમિયાન અધિકારીની કારમાંથી લાંચમાં સ્વીકારેલી રોકડ રકમ મળી આવતા તેમને સ્થળ પર જ દબોચી લેવામાં આવ્યા હતા.

ACBએ તાત્કાલિક અસરથી AB ચૌધરીની અટકાયત કરી છે. તેમની કાર અને અન્ય સ્થળોની તપાસ હાથ ધરવામાં આવી છે. આ લાંચકાંડમાં અન્ય કોઈ અધિકારી કે કર્મચારીની સંડોવણી છે કે કેમ, તેમજ અગાઉ પણ તેમણે કેટલીક રકમ લાંચ તરીકે ઉઘરાવી છે, તે દિશામાં ACB ઊંડાણપૂર્વક તપાસ કરી રહી છે.