અમદાવાદ : ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) દ્વારા ધોરણ-10 (SSC) અને સંસ્કૃત પ્રથમાની પરીક્ષા આપનારા લાખો વિદ્યાર્થીઓની રાહ હવે પૂરી થઈ છે. માર્ચ મહિનામાં લેવાયેલી બોર્ડની પરીક્ષાનું પરિણામ આવતીકાલે એટલે કે 6 મે, 2026 ના રોજ સવારે 8:00 વાગ્યે સત્તાવાર રીતે જાહેર કરવામાં આવશે.

   વિદ્યાર્થીઓ અને વાલીઓ પોતાનું પરિણામ બે સરળ રીતોથી જાણી શકશે, જેમાં પ્રથમ રીત મુજબ બોર્ડની ઓફિશિયલ વેબસાઇટ gseb.org પર જઈને પોતાનો સીટ નંબર દાખલ કરીને રિઝલ્ટ જોઈ શકાશે. આ ઉપરાંત, આ વર્ષે બોર્ડે ટેકનોલોજીનો ઉપયોગ કરી પ્રક્રિયા વધુ સરળ બનાવી છે, જે અંતર્ગત વિદ્યાર્થીઓ પોતાનો બેઠક ક્રમાંક WhatsApp નંબર 6357300971 પર મોકલીને પણ પોતાનું પરિણામ તરત જ મેળવી શકશે

ઉલ્લેખનીય છે કે, વર્ષ 2026ની ધોરણ-10ની પરીક્ષા 26 ફેબ્રુઆરીથી 16 માર્ચ દરમિયાન યોજાઈ હતી. સમગ્ર રાજ્યમાંથી અંદાજે 15 લાખથી વધુ વિદ્યાર્થીઓએ આ પરીક્ષા આપી હતી. ધોરણ-12ના પરિણામો જાહેર થયા બાદ હવે ધોરણ-10ના વિદ્યાર્થીઓમાં પોતાના રિઝલ્ટને લઈને ભારે ઉત્તેજના જોવા મળી રહી છે.

બોર્ડની અખબારી યાદી મુજબ, શાળાઓમાં ગુણપત્રક અને પ્રમાણપત્ર મોકલવા અંગેની સૂચનાઓ આગામી સમયમાં આપવામાં આવશે. જો કોઈ વિદ્યાર્થીને પોતાના ગુણ બાબતે સંતોષ ન હોય અને રી-ચેકિંગ એટલે કે ગુણચકાસણી કરાવવી હોય, તો તેના માટે ઓનલાઇન અરજી કરવાની રહેશે. આ ઉપરાંત, પૂરક પરીક્ષા 2026 માટેના ફોર્મ ભરવા અને નામ સુધારા અંગેની વિગતો પણ ટૂંક સમયમાં બોર્ડની વેબસાઇટ પર જાહેર કરવામાં આવશે.