વડોદરામાં પૂર્વ ક્રિકેટર અને તૃણમૂલ કોંગ્રેસના સાંસદ રહી ચૂકેલા યુસુફ પઠાણને કરોડો રૂપિયાની જમીન ફાળવવાના નિર્ણયને લઈને વિવાદ સર્જાયો છે. રાજ્ય સરકારે વડોદરા મ્યુનિસિપલ કોર્પોરેશનની માલિકીની તાંદળજા-વાસણા રોડ પર આવેલી જમીન ફાળવવાનો માર્ગ મોકળો કરતાં કોંગ્રેસ વિરોધમાં ઊતરી છે. કોંગ્રેસનો દાવો છે કે આશરે 20 કરોડ રૂપિયાનો પ્લોટ મફતમાં આપવામાં આવી રહ્યો છે. કોંગ્રેસે આ દરખાસ્ત નામંજૂર કરવાની સાથે છેલ્લા 14 વર્ષના કબજાનું ભાડું વસૂલવાની માગ કરી છે.

યુસુફ પઠાણને જમીન ફાળવવાના નિર્ણય સામે વડોદરા કોંગ્રેસના પ્રમુખ અને કાર્યકરોએ વિરોધ નોંધાવ્યો છે. કોંગ્રેસે સ્થાયી સમિતિની બેઠકમાં જમીન ફાળવણીની દરખાસ્ત નામંજૂર કરવાની માગ કરી છે. કોંગ્રેસના જણાવ્યા અનુસાર, કરોડો રૂપિયાની કિંમતી જમીન આ રીતે ફાળવવી યોગ્ય નથી. કોંગ્રેસે ચેતવણી આપી છે કે જો પ્લોટ ફાળવવામાં આવશે તો તે દિવસને કાળા દિવસ તરીકે મનાવવામાં આવશે.

વડોદરા મ્યુનિસિપલ કોર્પોરેશનની માલિકીની ટીપી સ્કીમ નંબર 22 ના ફાઇનલ પ્લોટ નંબર 90 માં કુલ 978 ચોરસ મીટર જમીન આવેલી છે. સરકારની મંજૂરી મુજબ, તેમાંથી 500 ચોરસ મીટર જમીન યુસુફ પઠાણને ભેટસ્વરૂપે અને બાકીની 478 ચોરસ મીટર જમીન વુડાની મૂલ્યાંકન સમિતિએ નક્કી કરેલા પ્રવર્તમાન મૂલ્યાંકનના 55 ટકા દરે ફાળવવાની દરખાસ્ત છે. આ રીતે બાકીની જમીન પર 45 ટકા રાહત આપવામાં આવશે.

યુસુફ પઠાણે વર્ષ 2012 માં મ્યુનિસિપલ કમિશનરને અરજી કરીને પોતાના નિવાસસ્થાનની બાજુમાં આવેલી જમીન ફાળવવાની માગ કરી હતી. તેમણે આંતરરાષ્ટ્રીય ક્રિકેટર હોવાને કારણે સુરક્ષાની દૃષ્ટિએ આ જમીન રહેણાક હેતુ માટે ફાળવવા રજૂઆત કરી હતી. નીતિ-નિયમો મુજબ નક્કી થતી કિંમત ચૂકવવાની સંમતિ પણ દર્શાવી હતી. જોકે, વર્ષ 2014 માં રાજ્ય સરકારે જાહેર હરાજી વિના જમીન ફાળવવાનો ઇનકાર કર્યો હતો.

સરકારની મંજૂરી ન હોવા છતાં વિવાદિત પ્લોટ પર બાઉન્ડ્રી વોલ અને શેડ બનાવવામાં આવ્યા હતા. વર્ષ 2024 ની લોકસભા ચૂંટણીમાં યુસુફ પઠાણ વિજયી બન્યા બાદ સ્થાનિક ભાજપના કાઉન્સિલરની ફરિયાદને આધારે કોર્પોરેશને આ બાંધકામને ગેરકાયદે દબાણ ગણાવી ડિમોલિશન નોટિસ ફટકારી હતી. પઠાણે હાઇકોર્ટમાં આ નોટિસને પડકારી હતી. ત્યારબાદ 31 ઓગસ્ટે તેમના વકીલે બિનશરતી દિલગીરી વ્યક્ત કરીને કેસ પાછો ખેંચ્યો હતો.

રાજ્ય સરકારે યુસુફ પઠાણના વર્ષ 2007 ના ટી-20 વિશ્વકપ અને 2011ના ક્રિકેટ વિશ્વકપમાં યોગદાનને ધ્યાનમાં રાખીને જમીન ફાળવણીને મંજૂરી આપી છે. શહેરી વિકાસ સત્તામંડળના રેગ્યુલેશન-2002ના નિયમ 13 હેઠળ ખાસ કિસ્સામાં આ નિર્ણય લેવામાં આવ્યો છે. ફાળવણીને ભવિષ્યમાં અન્ય કિસ્સાઓ માટે પૂર્વદૃષ્ટાંત ગણવામાં નહીં આવે તેવી શરત પણ રાખવામાં આવી છે. કોર્પોરેશનને ફાળવવામાં આવનારી જમીનની કિંમત જેટલી જમીન મહેસૂલ વિભાગ દ્વારા આપવાની જોગવાઈ કરવામાં આવી છે.

યુસુફ પઠાણે તૃણમૂલ કોંગ્રેસ છોડ્યા બાદ રાજ્ય સરકારે જમીન ફાળવણીને મંજૂરી આપ્યાનો મુદ્દો પણ ચર્ચામાં આવ્યો છે. આ નિર્ણયના સમયને લઈને રાજકીય સવાલો ઊભા થયા છે. બીજી તરફ કોંગ્રેસે જમીન ફાળવણીનો વિરોધ યથાવત્ રાખીને સ્થાયી સમિતિ સમક્ષ દરખાસ્ત નામંજૂર કરવા અને 14 વર્ષના કબજાનું ભાડું વસૂલવાની માગણી કરી છે.