અમદાવાદ : ગુજરાતમાં તાજેતરમાં ખેડૂતોના આંદોલન બાદ હવે કોંગ્રેસ પક્ષે રાજ્યના વિદ્યાર્થીઓના ભવિષ્યને લઈને સરકાર સામે મોરચો માંડ્યો છે. શિક્ષણ ક્ષેત્રે ફેલાયેલી ગેરરીતિઓ અને વારંવાર થતા પેપર લીકના બનાવોને કારણે લાખો વિદ્યાર્થીઓની વર્ષોની મહેનત પાણીમાં ગઈ છે. આ આક્રોશને વાચા આપવા માટે ગુજરાત પ્રદેશ કોંગ્રેસ સમિતિએ 'છાત્ર-ગુંજ' નામના આંદોલનની જાહેરાત કરી છે, જેના દ્વારા આગામી દિવસોમાં રાજ્યભરમાં તંત્રની પોલ ખોલવામાં આવશે.
ગુજરાત કોંગ્રેસના પ્રમુખ અમિત ચાવડાએ પત્રકાર પરિષદમાં આક્રમક વલણ અપનાવતા જણાવ્યું હતું કે, દેશભરની શિક્ષણ વ્યવસ્થા આજે માત્ર એક 'લૂંટનું માધ્યમ' બનીને રહી ગઈ છે. તેમણે NEET પરીક્ષામાં પેપર લીકના ગંભીર આક્ષેપોને મુખ્ય મુદ્દો બનાવતા કહ્યું કે, માત્ર ગુજરાતમાં જ 80,000 થી વધુ અને દેશભરમાં 22 લાખથી વધુ વિદ્યાર્થીઓ આ કૌભાંડોનો ભોગ બન્યા છે. વારંવાર પેપર લીક થવા એ કોઈ સામાન્ય વહીવટી ભૂલ નથી, પરંતુ સમગ્ર પરીક્ષા પદ્ધતિની નિષ્ફળતા અને તેમાં રહેલા ઊંડા કૌભાંડોની સાબિતી છે.
કોંગ્રેસે આંકડાકીય વિગતો સાથે કેન્દ્ર સરકાર પર પ્રહારો કરતા જણાવ્યું હતું કે, વડાપ્રધાનના છેલ્લા દસ વર્ષના શાસનમાં અંદાજે 89 જેટલા પેપર લીકના બનાવો સામે આવ્યા છે, જેના કારણે 48 જેટલી પરીક્ષાઓ ફરીથી લેવાની ફરજ પડી છે. NEET ઉપરાંત CBSE, SSC, NDA જેવી મહત્વપૂર્ણ પરીક્ષાઓ પણ કૌભાંડોના વમળમાં ફસાયેલી છે. બિનસચિવાલય ક્લાર્ક, જુનિયર ક્લાર્ક, હેડ ક્લાર્ક અને ફોરેસ્ટ ગાર્ડ જેવી ભરતી પરીક્ષાઓમાં પણ યુવાનોને રસ્તા પર ઉતરીને સંઘર્ષ કરવો પડ્યો હોવા છતાં, જવાબદાર અધિકારીઓ સામે કોઈ દાખલારૂપ પગલાં લેવામાં આવ્યા નથી.
વિદ્યાર્થીઓ અને વાલીઓનો શિક્ષણ પ્રણાલી પરથી વિશ્વાસ ઉઠી રહ્યો છે, તેમ છતાં કેન્દ્ર સરકાર કે વડાપ્રધાન દ્વારા આ નૈતિક નિષ્ફળતાની કોઈ જવાબદારી સ્વીકારવામાં આવી નથી. શિક્ષણ પ્રધાનના રાજીનામાની માંગ સાથે કોંગ્રેસે હવે 'છાત્ર-ગુંજ' કાર્યક્રમ દ્વારા સમગ્ર રાજ્યમાં આ મુદ્દાને જીવંત રાખવાનું નક્કી કર્યું છે. 22-23 જૂને રાજ્યના તમામ જિલ્લાઓમાં પ્રેસ કોન્ફરન્સ યોજીને કોંગ્રેસ વિદ્યાર્થીઓના આ અન્યાય સામે અવાજ બુલંદ કરશે અને સરકારને આકરા પ્રશ્નોના કઠેડામાં ઉભી કરશે. શું આ આંદોલન સરકારને શિક્ષણ સુધારવા માટે મજબૂર કરી શકશે? તે જોવું હવે આવનારા દિવસોમાં રસપ્રદ રહેશે.