અમદાવાદ :દિવાળીનો તહેવાર નજીક આવી રહ્યો છે, ત્યારે વતન જતા પ્રવાસીઓ માટે ગુજરાત એસટી નિગમ (GSRTC) દ્વારા અત્યંત મહત્વપૂર્ણ અને રાહતરૂપ નિર્ણય લેવામાં આવ્યો છે. તહેવારોના દિવસોમાં મુસાફરોની ભારે ભીડ અને ધસારાને પહોંચી વળવા માટે નિગમ દ્વારા વિશેષ આયોજન કરવામાં આવ્યું છે, જેનાથી મુસાફરોની સફર વધુ સરળ અને આરામદાયક બનશે.

મુસાફરોના ભારે ધસારાને ધ્યાનમાં રાખીને એસટી નિગમ દ્વારા કુલ 2400 એક્સ્ટ્રા બસો ફાળવવામાં આવી છે. આ બસો દ્વારા તહેવાર દરમિયાન કુલ 8000થી વધુ વધારાની ટ્રીપનું સંચાલન કરવામાં આવશે. ખાસ કરીને સુરતથી સૌરાષ્ટ્ર અને ઉત્તર ગુજરાત તરફ જતા મુસાફરોની સંખ્યાને ધ્યાનમાં રાખીને આ વધારાની ટ્રીપનું વિશેષ આયોજન કરાયું છે, જેથી કોઈપણ મુસાફરને વતન જવામાં મુશ્કેલી ન પડે.

મુસાફરોની સુવિધા માટે આ વધારાની બસોનું સંચાલન આગામી 4 થી 7 નવેમ્બર દરમિયાન કરવામાં આવશે. આ ચાર દિવસો દરમિયાન મુખ્ય શહેરોમાંથી વધારાની બસો નિયમિત રૂટ ઉપરાંત ખાસ ફ્રિકવન્સી સાથે દોડાવવામાં આવશે, જેથી પ્રવાસીઓ સમયસર પોતાના ગંતવ્ય સ્થાને પહોંચી શકે.