અમદાવાદ: દેશભરના ક્રિકેટ પ્રેમીઓની નજર અત્યારે અમદાવાદ પર ટકેલી છે. આવતીકાલે, 31 મેના રોજ નરેન્દ્ર મોદી સ્ટેડિયમ ખાતે ઈન્ડિયન પ્રીમિયર લીગ (IPL 2026)ની ગ્રાન્ડ ફાઈનલ રમાવા જઈ રહી છે. ગુજરાત ટાઈટન્સ (GT) અને રોયલ ચેલેન્જર્સ બેંગ્લુરુ (RCB) વચ્ચેના આ જંગને લઈને ક્રિકેટ ચાહકોમાં થનગનાટ જોવા મળી રહ્યો છે. ફાઈનલની ટિકિટ મેળવવા માટે આજે અમદાવાદમાં 43 ડિગ્રીની કાળઝાળ ગરમીમાં પણ હજારો લોકો સ્ટેડિયમ બહાર કતારમાં ઉભા જોવા મળ્યા હતા.
ટિકિટ માટે જહેમત અને ઓનલાઈન બુકિંગમાં મૂંઝવણ
સ્ટેડિયમની ટિકિટ બારી પર ફિઝિકલ ટિકિટ લેવા માટે આવતા ક્રિકેટ પ્રેમીઓ માટે [Aadhaar Redacted] કાર્ડ બતાવવું ફરજિયાત છે. જોકે, ઓનલાઈન ટિકિટ બુક કરનારા ઘણા ચાહકો માટે પરિસ્થિતિ થોડી ગૂંચવણભરી બની છે. એવા અહેવાલો છે કે કેટલાક ચાહકોના બેંક ખાતામાંથી ટિકિટના પૈસા કપાઈ ગયા હોવા છતાં એપ્લિકેશન પર બુકિંગ કન્ફર્મ ન બતાવતા લોકોમાં નિરાશા અને રોષ જોવા મળ્યો હતો. તંત્ર દ્વારા આ ટેકનિકલ સમસ્યાઓ ઉકેલવા માટેના પ્રયાસો કરવામાં આવી રહ્યા છે.
લોખંડી સુરક્ષા વ્યવસ્થા: પોલીસ કમિશનર જાતે કરશે મોનિટરિંગ
IPL ફાઈનલની ભવ્યતા અને સુરક્ષાને ધ્યાનમાં રાખીને અમદાવાદ પોલીસ એકશન મોડમાં આવી ગઈ છે. મેચ દરમિયાન કોઈ અનિચ્છનીય ઘટના ન ઘટે તે માટે આજે (30 મે) સ્ટેડિયમ ખાતે વિશેષ સુરક્ષા રિહર્સલનું આયોજન કરવામાં આવ્યું હતું. પોલીસ કમિશનર સ્વયં આ સુરક્ષા વ્યવસ્થાનું નિરીક્ષણ કરી રહ્યા છે. સ્ટેડિયમના દરેક એન્ટ્રી-એક્ઝિટ પોઈન્ટ્સ અને ક્રાઉડ મેનેજમેન્ટ પર પોલીસનો સઘન બંદોબસ્ત ગોઠવવામાં આવ્યો છે.
ખરાખરીનો જંગ: કોણ બનશે ચેમ્પિયન?
GT અને RCB બંને ટીમો અગાઉ એક-એક વખત આ ખિતાબ જીતી ચૂકી છે, તેથી આવતીકાલની ફાઈનલ મેચમાં બંને ટીમો પોતાનું સર્વસ્વ આપી દેશે તે નક્કી છે. અમદાવાદનું આ વિશાળ સ્ટેડિયમ કાલે લાખો પ્રેક્ષકોથી ખીચોખીચ ભરાઈ જશે અને એક ઐતિહાસિક મેચનો સાક્ષી બનશે. અમદાવાદ શહેર અત્યારે જાણે કે ક્રિકેટના રંગમાં રંગાઈ ગયું છે.